Бухоро туманида куз-қиш мавсумини бехатар ўтказиш ва хавфсизликни таъминлаш масалалари муҳокама қилинди
2026-10-21 09:40:00 / Янгиликлар
Бухоро тумани ҳокими Анваржон Очилов бошчилигида куз-қиш мавсумини бехатар ўтказиш, ёнғинлар, ис газидан заҳарланиш ҳамда ҳаво-газ аралашмасининг чақнаши билан боғлиқ фавқулодда ҳолатларнинг олдини олиш ва аҳоли хавфсизлигини таъминлаш масалаларига бағишланган йиғилиш ўтказилди.
Йиғилишда аҳоли хонадонлари, ижтимоий соҳа объектлари, кўп квартирали уйлар, бозорлар ва савдо мажмуаларида ёнғин хавфсизлиги қоидаларига қатъий риоя этиш, электр энергияси ва табиий газ таъминоти барқарорлигини таъминлаш бўйича амалга оширилиши лозим бўлган вазифалар муҳокама қилинди.
Куз-қиш мавсумида юзага келиши мумкин бўлган фавқулодда вазиятларнинг олдини олиш мақсадида аҳоли хонадонларидаги иситиш мосламалари, мўрилар ва шамоллатиш каналларининг техник ҳолатини текшириш, аниқланган камчиликларни ўз вақтида бартараф этиш ҳамда носоз электр ва газ жиҳозларидан фойдаланишга йўл қўймаслик зарурлиги таъкидланди.
Шунингдек, таълим ва тиббиёт муассасаларининг мавсумга тайёргарлигини таъминлаш, иситиш тизимлари ва қозонхоналарнинг созлигини текшириш, бозорлар ҳамда савдо мажмуаларида ёнғин хавфсизлиги талабларига риоя этилишини назорат қилиш бўйича тегишли вазифалар белгиланди.
Маҳаллаларда аҳоли ўртасида тушунтириш ва тарғибот ишларини кучайтириш, ис газидан заҳарланиш ва ёнғинларнинг олдини олиш, фуқароларнинг хавфсизлик қоидаларига риоя этиш борасидаги масъулиятини ошириш муҳимлиги қайд этилди.
Йиғилиш якунида масъул ташкилотлар ва идоралар раҳбарларига белгиланган вазифаларни ўз вақтида ва сифатли бажариш, мавсум давомида юзага келиши мумкин бўлган хавф-хатарларни олдиндан аниқлаш ҳамда бартараф этиш юзасидан тегишли топшириқлар берилди.
Асосий мақсад — Бухоро туманида куз-қиш мавсумини хавфсиз ўтказиш, аҳоли учун муносиб шароит яратиш ҳамда инсон ҳаёти ва саломатлигини муҳофаза қилиш.