Бухоро тумани: «Жўйзар» каналининг қолган қисми ҳам бетонлаштирилмоқда
2026-10-20 15:50:00 / Мажлислар
Бухоро туманида сув ресурсларидан оқилона фойдаланиш, суғориш тизимини такомиллаштириш ҳамда қишлоқ хўжалиги экин майдонларини барқарор сув билан таъминлаш борасида изчил ишлар олиб борилмоқда. Хусусан, туман ҳудудидан ўтувчи «Жўйзар» каналини бетонлаштириш ишлари давом эттирилмоқда.
Лойиҳанинг умумий узунлиги 22,5 километрни ташкил этади. Бугунги кунга қадар каналнинг дастлабки 10 километрлик қисмида бетонлаштириш ишлари тўлиқ якунланган.
Ҳозирда каналнинг қолган қисмида ҳам бетонлаштириш ишлари олиб борилмоқда. Қурилиш жараёнида суғориш мавсумини инобатга олган ҳолда, аҳоли ва фермер хўжаликларининг сувга бўлган эҳтиёжини таъминлашга алоҳида эътибор қаратилмоқда. Ишлар белгиланган тартибда босқичма-босқич амалга оширилмоқда.
1938 йилда барпо этилган «Жўйзар» канали бугунги кунда Бухоро тумани ва унга туташ ҳудудлардаги 13 минг гектардан ортиқ қишлоқ хўжалиги ерларини сув билан таъминлашда муҳим ўрин тутади. Канални бетонлаштириш сувнинг сизиб кетиши натижасидаги йўқотишларни камайтириш, сув етказиб бериш самарадорлигини ошириш ҳамда мавжуд сув ресурсларидан унумли фойдаланиш имконини беради.
Каналнинг қолган қисмини ҳам бетонлаштириш ишлари якунлангач, суғориш тизимининг самарадорлигини ошириш, сув тақсимотини яхшилаш ва деҳқон ҳамда фермер хўжаликлари учун қулай шароитлар яратишга эришилади.
Бухоро туманида амалга оширилаётган ушбу лойиҳа сув ресурсларини тежаш, қишлоқ хўжалигини барқарор ривожлантириш ва суғориш инфратузилмасини такомиллаштиришга хизмат қилади.