Бухоро туманида ёшлар бандлигини таъминлаш ва уларни қўллаб-қувватлашга алоҳида эътибор қаратилмоқда
2026-10-15 16:05:00 / Янгиликлар
Ҳафтaнинг ҳар пайшанба куни “Ёшлар куни” сифатида ёшлар билан очиқ мулоқот қилиш, уларнинг муаммо ва таклифларини ўрганиш, ташаббусларини қўллаб-қувватлаш ҳамда мурожаатларига амалий ечим топишга алоҳида эътибор қаратилмоқда.
Шу мақсадда 15 октябрь куни Бухоро тумани ҳокими Анваржон Очилов бошчилигида туман ҳокимлигида умумтаълим мактабларини тамомлаган, ҳозирда ишсиз бўлган ёшлар билан навбатдаги учрашув бўлиб ўтди.
Учрашувдан кўзланган асосий мақсад ёшларнинг бандлигини таъминлаш, уларни ишга жойлаштириш, касб-ҳунарга йўналтириш ҳамда келгусида ўз фаолиятини йўлга қўйиш истагидаги ёшларга зарур кўмак кўрсатишдан иборат.
Очиқ мулоқот давомида ёшларнинг иш билан таъминланиши, мавжуд бўш иш ўринларидан самарали фойдаланиши, касбий билим ва кўникмаларини ривожлантириши ҳамда тадбиркорлик фаолиятини бошлаши билан боғлиқ масалалар муҳокама қилинди. Шунингдек, ёшларнинг мурожаатлари, таклиф ва ташаббуслари тингланиб, уларни қийнаётган муаммоларни ҳал этиш юзасидан фикр алмашилди.
Мулоқот жараёнида ҳар бир ёшнинг мурожаатини алоҳида ўрганиш, мавжуд имкониятлардан келиб чиқиб, муаммоларга амалий ечим топиш ҳамда уларнинг бандлигини таъминлашга кўмаклашиш масалаларига эътибор қаратилди. Тегишли масъулларга ёшлар мурожаатларида кўтарилган масалаларни ўрганиш ва уларнинг ечими бўйича зарур чораларни кўриш вазифалари белгиланди.
Таъкидлаш жоизки, ёшлар билан бундай очиқ мулоқотларнинг мунтазам ташкил этилиши уларнинг муаммоларини ўз вақтида аниқлаш, бандлигини таъминлаш, қизиқиш ва қобилиятларини рўёбга чиқариш ҳамда жамиятда ўз ўрнини топишига кўмаклашишда муҳим аҳамият касб этади.
Бухоро туманида ёшларни ҳар томонлама қўллаб-қувватлаш, уларнинг бандлигини таъминлаш, ташаббусларини рағбатлантириш ва мавжуд муаммоларига амалий ечим топиш борасидаги ишлар изчил давом эттирилади.