Бухоро тумани: Янги турмуш маҳалласида Тилав Саидов “Яшил макон” умуммиллий лойиҳасининг кузги мавсуми учун 300 минг дона кўчат тайёрлади
2026-09-28 18:00:00 / Янгиликлар
Бухоро туманининг Янги турмуш маҳалласида яшовчи фуқаро Тилав Саидов хонадонида бўлиб, унинг кўчат етиштириш борасидаги фаолияти билан танишдик.
Тилав Саидов хонадонида ҳамда деҳқон хўжалиги учун ажратилган 15 сотих ер майдонида манзарали ва мевали дарахт кўчатларини етиштириш билан шуғулланмоқда. У ҳудуднинг тупроқ-иқлим шароитига мос бўлган дарахт ва бута кўчатларини кўпайтиришга алоҳида эътибор қаратмоқда.
Айни пайтда унинг кўчатхонасида кlyон, каталпа, япон сакураси, шоҳи акация, ясин, айлант, аморфа каби манзарали дарахт ва бута кўчатлари етиштирилмоқда.
Кўчат етиштириш жараёнида уларнинг ҳудуд шароитига мослашуви, парвариши ва сифатли ривожланишига алоҳида эътибор қаратилмоқда. Бу эса келгусида маҳаллалар, аҳоли хонадонлари ва бошқа ҳудудларни кўкаламзорлаштириш учун сифатли кўчатлар етказиб бериш имконини бермоқда.
Тилав Саидов “Яшил макон” умуммиллий лойиҳасининг кузги мавсумида ҳам фаол иштирок этишни мақсад қилган. Шу мақсадда 300 минг дона манзарали ва мевали дарахт кўчати тайёрлаб қўйилган.
“Яшил макон” умуммиллий лойиҳаси доирасида ҳудудларнинг яшиллик даражасини ошириш, дарахт ва буталарни кўпайтириш, атроф-муҳитни ободонлаштириш ҳамда экологик муҳитни яхшилашга қаратилган ишлар изчил давом эттирилмоқда.
Янги турмуш маҳалласида йўлга қўйилган ушбу фаолият ер майдонларидан самарали фойдаланиш, кўчат етиштиришни ривожлантириш ва аҳоли учун қўшимча даромад манбаларини яратиш борасидаги амалий ташаббуслардан биридир.
Бугун парвариш қилинаётган ҳар бир кўчат эртанги куннинг янада яшил ва обод ҳудудларини яратишга хизмат қилади. Тилав Саидов томонидан тайёрланган 300 минг дона кўчат эса “Яшил макон” умуммиллий лойиҳасининг кузги мавсумида ҳудудларни кўкаламзорлаштириш ишларига муносиб ҳисса бўлиб қўшилади.