Инсон қадри ва ёшлар келажаги — эътибор марказида
2026-08-22 13:00:00 / Янгиликлар
Ўзбекистон Республикаси давлат мустақиллигининг 35 йиллиги арафасида Бухоро туманида ижтимоий ҳимояга муҳтож оилаларни қўллаб-қувватлаш, уларнинг фарзандларига муносиб таълим олишлари учун зарур шароит яратиш ҳамда ёшларни ҳар томонлама рағбатлантиришга қаратилган хайрли тадбир ташкил этилди.
Туман ҳокимлиги ҳамда «Маҳалла» хайрия жамоат фонди ҳамкорлигида Бухоро туманидаги 25-умумий ўрта таълим мактабида ташкил этилган тадбирда Бухоро туман ҳокими Анваржон Очилов бошчилигидаги корхона ва ташкилотлар раҳбарлари иштирок этди.
Тадбир давомида ижтимоий ҳимояга муҳтож оилаларнинг 55 нафар фарзандига мактаб формалари топширилди. Ушбу эзгу ташаббус болаларнинг янги ўқув йилини муносиб тайёргарлик билан бошлашига кўмаклашиш, оилаларнинг моддий юкини енгиллаштириш ҳамда фарзандларнинг таълим олиши учун тенг имкониятлар яратишга хизмат қилади.
Шунингдек, ижтимоий ҳимояга муҳтож оилаларни қўллаб-қувватлаш, уларнинг бандлигини таъминлаш ва барқарор даромад манбаини яратиш мақсадида амалий ёрдамлар кўрсатилди. Жумладан, «Камбағаллик реестри»нинг қизил тоифасига киритилган бир нафар аёлга гўзаллик салони фаолиятини йўлга қўйиш учун зарур жиҳозлар, бир нафар ёшга эса пайвандлаш ускуналари топширилди.
Бундай амалий кўмак фуқароларнинг ўзини ўзи банд қилиши, касб-ҳунар орқали даромад топиши ва оилавий фаровонлигини оширишига хизмат қилади. Энг муҳими, аҳолининг ижтимоий ҳимояга муҳтож қатламига кўмак кўрсатиш билан бирга, уларнинг келгусида мустақил даромад топиши учун зарур шароитлар яратилмоқда.
Тадбирда маҳаллаларда ёшлар билан ишлаш самарадорлигини янада ошириш масаласига ҳам алоҳида эътибор қаратилди. Шу мақсадда бир нафар ёшлар етакчисига компьютер жамланмаси, яна икки нафар ёшлар етакчисига китоблар тўплами совға қилинди.
Мазкур совғалар ёшлар етакчиларининг маҳаллаларда ёшлар билан ишлаш жараёнини замонавий ва самарали ташкил этиши, уларнинг муаммоларини ўрганиши, ташаббусларини қўллаб-қувватлаши ҳамда бўш вақтини мазмунли ташкил этиши учун қўшимча имконият яратади.
Бугунги кунда давлатимиз томонидан ёшларнинг билим олиши, касб-ҳунар эгаллаши, замонавий технологияларни ўзлаштириши ва ўз иқтидорини намоён этиши учун кенг имкониятлар яратилмоқда. Бухоро туманида ташкил этилаётган бундай хайрли тадбирлар эса мазкур имкониятларни амалий қўллаб-қувватлаш, ёшлар ва ижтимоий ҳимояга муҳтож оилаларга эътиборни янада кучайтиришга хизмат қилмоқда.
Инсон қадрини улуғлаш, эҳтиёжманд оилаларни қўллаб-қувватлаш, аҳоли бандлигини таъминлаш ва ёшлар учун муносиб шароит яратиш — Бухоро туманида амалга оширилаётган ишларнинг муҳим йўналишларидан биридир.
Зеро, ҳар бир боланинг таълим олиши, ҳар бир оиланинг фаровонлиги ва ҳар бир ёшнинг ўз салоҳиятини рўёбга чиқариши учун яратилган имкониятлар юртимиз тараққиёти ва халқимиз фаровонлигининг муҳим омилидир.