Бухоро туманида яна бир мактабгача таълим ташкилоти замонавий қиёфа касб этмоқда.
2026-07-29 10:20:00 / Янгиликлар
Бухоро туманида мактабгача таълим тизимини янада ривожлантириш, болажонлар учун замонавий, қулай ва хавфсиз шароитларни яратиш, таълим муассасаларининг моддий-техника базасини мустаҳкамлаш борасидаги бунёдкорлик ишлари изчил давом этмоқда. Ана шундай эзгу лойиҳалардан бири Қавола Маҳмуд маҳалласи Давлатобод қишлоғида жойлашган 46-сон давлат мактабгача таълим ташкилотида амалга оширилмоқда.
Айни пайтда мазкур таълим маскани 5,5 миллиард сўм маблағ эвазига "OBOD O‘LKA QURILISH SERVIS" МЧЖ томонидан мукаммал таъмирланмоқда. Лойиҳа доирасида бинога замонавий талаблар асосида реконструкция қилиш, ички ва ташқи қисмни тўлиқ янгилаш, муҳандислик-коммуникация тармоқларини таъмирлаш ҳамда ҳудудни ободонлаштириш ишлари олиб борилмоқда.
Маълумки, ушбу мактабгача таълим ташкилоти ўтган асрнинг 80-йилларида колхоз томонидан қурилган бўлиб, узоқ йиллар давомида етарли даражада таъмирланмагани сабабли анча эскириб, қаровсиз ҳолатга келиб қолган эди. Бугунги кунда Президентимиз томонидан таълим соҳасига қаратилган юксак эътибор ва кенг кўламли бунёдкорлик ишлари туфайли ушбу муассаса ҳам мутлақо янги қиёфа касб этмоқда.
— Раҳмат Президентимизга. Йиллар давомида таъмирталаб ҳолга келган ушбу боғча бугун замонавий кўринишга эга бўлаётгани, энг аввало, фарзандларимизнинг муносиб шароитларда тарбия олиши учун яратилаётган имкониятларнинг ёрқин ифодасидир, — дейди Халқ депутатлари Бухоро тумани Кенгаши раиси Рашид Набиев.
Қурилиш-таъмирлаш ишларининг бориши билан танишиш мақсадида Халқ депутатлари Бухоро тумани Кенгаши раиси Рашид Набиев ҳамда Кенгаш котибияти мудири С. Самадов объектга ташриф буюрди. Улар амалга оширилаётган ишлар сифати, қурилиш меъёрларига риоя этилиши ҳамда белгиланган муддатларда якунланиши юзасидан масъуллар билан суҳбатлашиб, ўз тавсия ва таклифларини билдирдилар.
Таъкидланганидек, мазкур лойиҳа якунлангач, 46-сон давлат мактабгача таълим ташкилоти замонавий талабларга жавоб берадиган, барча қулайликларга эга масканга айланади. Бу эса келажак эгалари бўлган болаларнинг сифатли таълим-тарбия олиши, уларнинг соғлом ва баркамол вояга етишига хизмат қилади.
Бухоро туманида таълим муассасаларини янгилаш ва уларнинг инфратузилмасини ривожлантиришга қаратилган бундай бунёдкорлик ишлари бундан буён ҳам изчил давом эттирилади.