Бухоро тумани: Қавола Маҳмуд маҳалласидаги “Ростехстрой” қўшма корхонаси ишлаб чиқариш ва экспорт салоҳиятини кенгайтирмоқда
2026-07-28 16:50:00 / Янгиликлар
Мамлакатимизда тўқимачилик саноатини замонавий технологиялар асосида ривожлантириш, пахта толасини чуқур қайта ишлаш, юқори қўшимча қийматга эга тайёр маҳсулотлар ишлаб чиқаришни кенгайтириш ҳамда янги иш ўринларини яратишга алоҳида эътибор қаратилмоқда. Бу борада Бухоро туманида ҳам истиқболли лойиҳалар изчил амалга оширилиб, ҳудуднинг саноат салоҳияти йилдан йилга юксалиб бормоқда.
Туманнинг Қавола Маҳмуд маҳалласида фаолият юритаётган “Ростехстрой” МЧЖ шаклидаги Ўзбекистон–Россия қўшма корхонаси ана шундай замонавий ишлаб чиқариш корхоналаридан биридир. Корхона трикотаж маҳсулотлари ишлаб чиқаришга ихтисослашган бўлиб, бугунги кунда 30 нафардан ортиқ маҳаллий аҳолини доимий иш ўрни билан таъминлаб келмоқда.
Корхонада Европа технологиялари асосида сифатли ва рақобатбардош маҳсулотлар ишлаб чиқарилмоқда. Хусусан, турли ўлчамдаги сочиқлар, чойшаблар, халатлар, парео тўпламлари ҳамда трикотаж футболкалари замонавий ускуналарда тайёрланиб, юқори сифат стандартлари асосида истеъмолчиларга етказиб берилмоқда.
Ишлаб чиқарилаётган маҳсулотлар нафақат ички бозор эҳтиёжини қондириш, балки экспорт географиясини кенгайтиришга ҳам хизмат қилмоқда. Айни пайтда корхона маҳсулотлари Россия, Қозоғистон, Қирғизистон ҳамда бошқа хорижий давлатларга экспорт қилиниб, маҳаллий маҳсулотларнинг халқаро бозордаги рақобатбардошлигини янада оширишга муносиб ҳисса қўшмоқда.
Бугун, 28 июль куни Халқ депутатлари Бухоро тумани Кенгаши депутати Р. Набиев ҳамда Кенгаш котибияти мудири С. Самадов корхона фаолияти билан яқиндан танишди. Ташриф давомида ишлаб чиқариш жараёнлари, яратилган меҳнат шароитлари, маҳсулот сифати ва экспорт кўрсаткичлари кўздан кечирилди. Шунингдек, корхонанинг истиқболдаги ривожланиш режалари, ишлаб чиқариш қувватларини кенгайтириш, янги иш ўринлари яратиш ҳамда экспорт ҳажмини ошириш масалалари юзасидан фикр алмашилди.
Бугунги кунда “Ростехстрой” қўшма корхонаси замонавий ишлаб чиқариш қувватлари, сифатли маҳсулотлари ва экспорт салоҳияти билан Бухоро тумани саноати ривожига муносиб ҳисса қўшиб келмоқда. Корхона фаолиятини янада кенгайтириш, маҳсулот турларини кўпайтириш ва янги бозорларни ўзлаштириш бўйича амалга оширилаётган ишлар ҳудуднинг иқтисодий тараққиёти ҳамда аҳоли бандлигини таъминлашда муҳим омил бўлиб хизмат қилмоқда.