Бухоро вилояти Бухоро тумани ҳокимлиги

Бухоро туманида тадбиркорлик субъектларини ҳар томонлама қўллаб-қувватлаш, улар учун қулай ишбилармонлик муҳитини яратиш, фаолият жараёнида юзага келаётган муаммоларни тезкор ҳал этиш ҳамда янги ташаббусларни рўёбга чиқаришга кўмаклашиш борасидаги ишлар изчил давом эттирилмоқда.

Шу мақсадда Бухоро тумани ҳокими Анваржон Очилов тадбиркорлар билан навбатдаги очиқ мулоқот ўтказди. Унда туман прокурори, Ички ишлар бўлими бошлиғи, давлат ташкилотлари ва идоралар масъуллари, шунингдек, туманда фаолият юритаётган турли йўналишдаги тадбиркорлар иштирок этди.

Учрашувда тадбиркорлик фаолиятини янада ривожлантириш, мавжуд ишлаб чиқариш қувватларини кенгайтириш, янги лойиҳаларни амалга ошириш, инвестицияларни жалб этиш ҳамда ҳудудда қўшимча иш ўринлари яратиш масалаларига алоҳида эътибор қаратилди.

Очиқ мулоқот давомида тадбиркорлар томонидан ўз фаолиятида дуч келаётган қатор масалалар юзасидан таклиф ва мурожаатлар билдирилди. Жумладан, электр энергияси ва табиий газ таъминоти, ер майдонларидан самарали фойдаланиш, кредит маблағларини ажратиш, ишлаб чиқариш инфратузилмасини яхшилаш, муҳандислик-коммуникация тармоқларига уланиш ҳамда бошқа йўналишлардаги масалалар муҳокама қилинди.

Бухоро тумани ҳокими Анваржон Очилов тадбиркорларнинг мурожаатларини диққат билан тинглаб, ҳар бир масалани тегишли мутасаддилар иштирокида атрофлича кўриб чиқди. Муаммоларни жойида ҳал этиш имконияти мавжуд бўлган ҳолатлар бўйича тегишли чоралар белгиланди. Қўшимча ўрганиш ва вақт талаб қиладиган масалалар эса назоратга олиниб, уларни ҳал этиш бўйича масъул раҳбарларга аниқ топшириқлар берилди.

Мулоқот давомида тадбиркорларнинг нафақат мавжуд муаммолари, балки ҳудуд иқтисодий ривожига хизмат қиладиган янги таклиф ва ташаббуслари ҳам муҳокама қилинди. Тадбиркорларнинг фаолиятини қўллаб-қувватлаш, уларнинг лойиҳаларини амалга оширишга кўмаклашиш ҳамда бюрократик тўсиқларни бартараф этиш бўйича тизимли ишларни давом эттириш зарурлиги таъкидланди.

Бугунги кунда Бухоро туманида кичик бизнес ва хусусий тадбиркорликни ривожлантириш, ишлаб чиқариш ва хизмат кўрсатиш соҳаларини кенгайтириш, аҳоли бандлигини таъминлашга қаратилган чора-тадбирлар изчил амалга оширилмоқда. Тадбиркорлар билан бундай очиқ мулоқотлар эса ҳудуд иқтисодий салоҳиятини ошириш, янги лойиҳаларни қўллаб-қувватлаш ва ишбилармонлар учун янада қулай шароитлар яратишда муҳим аҳамият касб этмоқда.

Келгусида ҳам тадбиркорлар билан мунтазам учрашувлар ташкил этилиб, уларнинг таклиф ва ташаббусларини қўллаб-қувватлаш, муаммоларини тезкор ҳал этиш ҳамда янги имкониятларни яратиш борасидаги ишлар давом эттирилади.