Бухоро шаҳар ҳокимлиги

Шу муносабат билан, Бухоро шаҳрида ҳам юртимиз мустақиллигининг 34 йиллиги муносабати билан қатор хайрли тадбирлар ташкил этилмоқда. Ана шундай эзгу ташаббуслардан бири сифатида эҳтиёжманд оилалар фарзандлари учун кенг кўламли суннат тўйи маросими уюштирилди.

Ушбу хайрли тадбирда турли маҳаллалардан сараланган, оилалари моддий жиҳатдан қийин аҳволда бўлган 34 нафар болажонларнинг суннат тўйи бўлиб ўтди. Шаҳар ҳокимлиги ва Ўзбекистон Маҳаллалари уюшмаси шаҳар бўлими томонидан ташкиллаштирилган тўй маросимида болалар учун миллий либослар, эсдалик совғалар тайёрланиб, уларга махсус байрам дастурхони ташкил этилди. 

Суннат тўйи муносабати билан сўзга чиққан шаҳар ҳокими Қурбон Турсунов мустақиллигимиз туфайли юртимизда тинчлик, барқарорлик ва халқ манфаатини кўзлаган эзгу ислоҳотлар самарасида айнан шундай тадбирларни ҳаётга татбиқ этиш имкони пайдо бўлганини таъкидлаб, болажонларга ўзининг эзгу тилакларини билдирди.

Бу каби инсонпарварлик ташаббуслари халқимиз ўртасида ўзаро меҳр-оқибат ва ҳамжиҳатликни мустаҳкамлашга, фарзандларимизни Ватанга муҳаббат ва инсонпарварлик руҳида тарбиялашга хизмат қилади. Шунингдек, тадбирда санъаткорлар чиқишлари, болалар учун ўйин-кулгилар ва маданий дастурлар бўлиб ўтди.

Бундай хайрли тадбирлар – Мустақиллик байрамининг маънавий шарафини юксалтириб, халқимиз қалбида юртга, Ватанга бўлган муҳаббат ва садоқатни янада мустаҳкамлайди.