Бухорода заргарлик кластери ўз фаолиятини бошлади
2026-02-19 12:35:00 / Янгиликлар
Мазкур лойиҳа Ўзбекистон Республикаси Президентининг 2024 йил 23 июлда қабул қилинган “Заргарлик буюмларини ишлаб чиқариш соҳасини янада ривожлантириш ва уларнинг рақобатбардошлигини таъминлаш чора-тадбирлари тўғрисида”ги Фармон ижроси доирасида амалга оширилди. Фармонга мувофиқ, 2024–2026 йилларда "Ўзмиллийбанк" АЖ иштирокида ҳудудларда замонавий заргарлик марказларини ташкил этиш вазифаси белгиланган эди.
Вазирлар Маҳкамасининг 2024 йил 18 сентябрдаги тегишли қарори билан тасдиқланган Дастурга асосан, заргарлик маркази Бухоро шаҳри Ислом Каримов кўчаси, 31-уй манзилида жойлашган бинода ташкил этилди. Лойиҳа қиймати 38 млрд сўмни ташкил этиб, уни амалга оширишда “NBU Jewelry Group” МЧЖ ҳамда туркиялик инвесторлар ҳамкор “ELLA Jewellry” корхонаси фаол иштирок этди.
Йиллик 300 килограммгача заргарлик буюмлари ишлаб чиқариш қувватига эга ушбу марказда 100 нафар янги иш ўрни яратилди. Лойиҳа доирасида йиллик бюджетга 2,5 млрд сўм солиқ тушумлари таъминланиши кутилмоқда.
Марказ жойлашган бино “NBU Jewelry Group” МЧЖ томонидан 2024 йил 16 декабрь куни аукцион орқали харид қилинди. Кейинчалик “EVEREST BUILDING ENGINEERING” МЧЖ қурилиш ташкилоти томонидан бино заргарлик маркази талабларига тўлиқ мос ҳолда капитал таъмирдан чиқарилди. Шунингдек, инвесторлар томонидан замонавий асбоб-ускуналар тўлиқ олиб келиниб, бинодаги иккинчи қаватга жойлаштирилди ва ишлаб чиқариш жараёнини бошлашга тўла тайёр ҳолатга келтирилди.
Очилиш маросимида "Ўзбекзаргарсаноати" уюшмаси раиси биринчи ўринбосари Нодир Мирахмедов, Бухоро вилоят ҳокимининг маҳаллий саноатни ривожлантириш масалалари бўйича ёрдамчиси Ҳусниддин Ғойиров, шунингдек, туркиялик инвесторлар сўзга чиқиб, ушбу кластер нафақат ҳудуд иқтисодиёти, балки миллий заргарлик саноатининг экспорт салоҳиятини оширишда муҳим аҳамият касб этишини таъкидладилар. Шундан сўнг муҳмонлар марказдаги шароитлар билан яқиндан танишишди
Бухоро заргарлик кластери қадимий ҳунармандчилик анъаналари ва замонавий технологиялар уйғунлигининг ёрқин намунаси бўлиб, у ҳудуд саноат салоҳиятини янада юксалтиришга хизмат қилади.