“Ғафур Ғулом” маҳалласида фаол хотин-қизлар ташаббуси қўллаб-қувватланилмоқда
2025-12-17 14:45:00 / Янгиликлар
Ана шундай ўз касбининг моҳир усталаридан бири — Азима Мирзаева Бухоро шаҳрининг “Ғафур Ғулом” маҳалласида истиқомат қилади. У ўзининг меҳнацеварлиги ва ташаббускорлиги билан тикувчилик соҳасида муносиб натижаларга эришиб келмоқда.
Тадбиркорнинг ташаббуси давлат томонидан қўллаб-қувватланиб, унга субсидия асосида тўғри чок ва оверлок тикув машиналари берилди. Натижада тикувчилик фаолияти йўлга қўйилди. Дастлаб уй шароитида иш бошлаган Азима Мирзаева кейинчалик фаолият кўламини кенгайтириб, ижарага жой олиб, тикув цехини ташкил этди. Бугунги кунда 2 нафар фуқаронинг бандлиги таъминланган.
Тикувчилик фаолиятидан олинаётган ойлик соф фойда 4-5 миллион сўмни ташкил этади. Ишчиларга уларнинг қилган меҳнатига яраша муносиб иш ҳақи тўланади. Улар томонидан тикилган либослар эса мижозлар қалбидан жой олиб, талабга эга бўлмоқда.
Яна бир қувонарли жиҳати шундаки, тадбиркор ўз қизини ҳам ҳунар сирларидан хабардор қилиб, ёшлигидан касбга ўргатмоқда. Зеро, ёшликда ўрганилган илм ва ҳунар тошга ўйилган нақш кабидир. Бугунги кунда у дарсдан бўш вақтларида турли хил сумкачалар тўқиш билан шуғулланмоқда.
Албатта, бундай саъй-ҳаракатларнинг барчаси фаровон ҳаёт сари ташланган мустаҳкам қадамдир.