Бухоро шаҳар ҳокимлиги

Шундай моҳир ҳунармандлардан бири — Маҳфуза Сатторова. У ўзининг ҳалол меҳнати ва қатъияти билан касбини санъат даражасига кўтарган инсон сифатида танилган. Бухоро шаҳридаги “Собир Раҳимов” маҳалласида яшовчи моҳир ҳунарманд давлат томонидан ажратилган 33 миллион сўмлик имтиёзли кредит ҳисобига тадбиркорлик фаолиятини бошлаган. Ишини пухта йўлга қўйгач, мижозлар доираси кенгайиб, унга қўшимча равишда 67 миллион сўмлик кредит ҳам ажратилди. Натижада тикувчилик фаолияти кенгайиб, замонавий шароитлар яратилди.

Бугунги кунда Маҳфуза Сатторовага тегишли тикувчилик масканида 10 нафар хотин-қиз доимий иш ўрнига эга бўлиб, уларнинг бандлиги мунтазам таъминлаб келинмоқда. Шунингдек, у 4 нафар шогирдига ҳунар сир-асрорларини ўргатиб, келажак тикувчиларини тарбияламоқда. Таъкидлаш жоизки, у фаолиятини турмуш ўртоғи Азим Жаъфаров билан бирга олиб боради. Улар яратган либослар нафислиги, дид билан безатилгани ва сифатли ишлангани сабаб нафақат шаҳримиз аёллари, балки хорижлик харидорлар орасида ҳам юқори эътибор қозонган. Айрим махсус буюртмалар ҳатто 200–300 АҚШ доллари қийматида тайёрланади. Ойлик соф даромади бир оиланинг тўлиқ фаровонлигини таъминлашга етарли бўлиб, ишчиларга 4–5 миллион сўм миқдорида ойлик маош тўланади.

“Собир Раҳимов” маҳалласи ҳунармандчилик ва тадбиркорлик ривож топган ҳудудлардан бири бўлиб, бу ерда 6050 нафар аҳоли, 1720 та хонадон ҳамда 1850 та оила истиқомат қилади. Маҳалла ривожининг асосий йўналишлари — хизмат кўрсатиш ва савдо. Маҳфуза Сатторова эса ўз меҳнати, ташаббуси ва дадиллиги билан ҳудуд тараққиётига муносиб ҳисса қўшиб келаётган фаол тадбиркорлардан биридир. Энг қувонарлиси, у яна қўшимча кредит олиб, фаолиятини янада кенгайтириш ва янги иш ўринларини яратишни мақсад қилган.