Бухоро шаҳар ҳокимлиги

2018-йил ташкил этилган корхонага Рахматжон Назаров раҳбарлик қилиб келмоқда. Мазкур ишлаб чиқариш субекти металл ва МДФ материалларидан эшик ҳамда деразалар тайёрлашга ихтисослашган бўлиб, қисқа вақт ичида ҳудудда ўзининг барқарор ўрнини эгаллаган. Ҳозирги кунда корхонада 5 нафар ишчи доимий равишда меҳнат қилмоқда ва ишлаб чиқариш жараёни маҳаллий бозор талабларига мослаштирилган.

Корхонанинг 2025-йил январ–октябр ойлари учун молиявий кўрсаткичлари ҳам ижобий динамикани намойиш этмоқда. Ушбу давр мобайнида жами 650 миллион сўмлик саноат маҳсулотлари ишлаб чиқарилди. Маҳсулотлар сифати, технологик жараёнлар ва маркетинг стратегиясининг босқичма-босқич ривожланиши корхонанинг бозор рақобатбардошлигини таъминлаб келмоқда.

Ўрганиш жараёнида ҳоким Қурбон Турсунов корхонанинг ишлаб чиқариш линияси, мавжуд технологиялар, ходимлар учун яратилган меҳнат шароитларини атрофлича кўздан кечирди. Шунингдек, корхона раҳбари томонидан янги ускуна харид қилиш, ишлаб чиқаришни кенгайтириш, маҳсулот турларини диверсификация қилиш ва қўшимча иш ўринлари яратиш бўйича режалар ҳам тақдим этилди.

Учрашув давомида шаҳар ҳокими корхонага тўсиқ бўлаётган муаммоларни тинглаб, уларни бартараф этишга қаратилган амалий ёрдам чораларини кўриб чиқишни тегишли мутасаддиларга топширди. Хусусан, ишлаб чиқариш майдонини кенгайтириш, бошқа маҳаллий корхоналар билан кооперацияни кучайтириш, кредит ва молиявий қўллаб-қувватлаш имкониятлари юзасидан ҳам тавсиялар берилди.

Қурбон Турсунов тадбиркорликни ривожлантириш шаҳар иқтисодиётининг ўсишида муҳим омил эканини таъкидлаб, маҳаллий ишлаб чиқарувчиларни қўллаб-қувватлаш, янги иш ўринларини яратиш ва ички бозорни сифатли маҳсулот билан таъминлаш борасида изчил чора-тадбирлар давом эттирилишини билдирди.