Бухоро вилояти ҳокимлиги

Ҳоким ёрдамчилари тавсиялари асосида маҳаллаларда ишлаб чиқариш, хизмат кўрсатиш ва ҳунармандчиликни кенгайтириш, аҳоли ва уй хўжаликлари билан ҳамкорликни кенгайтиришга қаратилган истиқболли лойиҳаларни молиялаштириш учун кредитлар ажратилаётгани жойларда камбағилликни қисқартиришга хизмат қилади. Айни кунда 190 мингдан ошиқ аҳолисига эга Жондор туманида ҳам бугун қишлоқ хўжалигида сезиларли ютуқларга эришилиб, аҳоли хонадонларида томорқадан фойдаланиш маданияти шакланмоқда. 

Вилоят ҳокими Ботир Зарипов Жондор тумани “Нурафшон” маҳалла фуқаролар йиғинида пешқадам томорқачилардан ака-ука Явмут ва Баҳодир Янгиевлар уй хўжаликларида бўлиб, иссиқхонадан фойдаланиш тажрибаси билан танишди. Маҳалланинг Сепатта қишлоғида яшовчи ака-ука миришкорлар ҳар бирида айни кунда 12 сотихдан кам бўлмаган иссиқхонаси бўлиб, оилалари даромад манбаига айлантирилган. 

— Асли касб-корим уста дурадгорлик бўлиб, кўп йил қишлоқдошлар хизматини қилдик. Шу билан бирга, томорқа меҳнатига азалдан меҳримиз баланд, – дейди Явмут Янгиев. — Шу боис, 15 сотихдан иборат томорқамизда иссиқхона ташкил этганимизга 6 йил бўлибди. Бунда йилига 2 марта бодринг, помидор етиштирсак, алмашлаб экишга риоя қилиб, қўшимчасига ёз ойларида тариқми, арпами экиб етиштирамиз. Масалан, декабрь ойида 10 сотих ерда помидорнинг “Аламина” навига мансуб 3 мингта кўчатидан ўтқазиб, парваришлаётган бўлсак, апрель ойида бундан 10 тоннага етказиб ҳосил олиш ҳаракатидамиз. Худди шундай, иссиқхонада 5 сотих ерда “Орзу” навли бодринг етиштиришга киришганмиз. Оиламиз, фарзандлар кўмагида биргина экиндан бир мартада 100 миллион сўм атрофида даромадга эришаётганимиз сарф-харажатимиз ўрнини қопламоқда. 

Иссиқхона меҳнати осон эмас, албатта. Кўчатлар ва ҳосилни қишдан олиб чиқиш учун Янгиевлар оиласи қарийб 70 тонна кўмир харид қилган. Кунлар совиб, ҳарорат кескин пасайган кунларда плёнка остидаги ҳароратни барқарор сақлаш чораси кўрилган. Шу тиниб-тинчимаслик, ҳаловатдан кечилгани ортидан соф фойда қўлга киритилмоқда. 

Бундан ташқари, хонадон оғилхонасида қорамол сони 4 бошга етказилиб, соғин сигир, икки бош ҳўкиз парваришланаётгани ёки ҳовли этагида алоҳида 1 сотих майдонда ҳовуз қазиб тайёрланиб, унда оқ амур балиғи боқилаётгани бир оила қут-баракасидан далолат. Бу ҳовуздан бир йилда 250 килограм атрофида “луқмаи ҳалол” олинаётган экан. Хонадон миришкорлари эса иссиқхонани кенгайтириб, маҳсулот етиштиришни кўпайтириш ҳаракатига тушишган.                 

Умуман, биргина 2024 йил деҳқончилик мавсумини олсак, эрта баҳордан туман аҳоли хонадонларининг жами 3 минг 384 гектар томорқа ерида сабзавот-полиз маҳсулотлари етиштирилган бўлиб, шундан  500 гектардан ошиқ ерда картошка, 400 гектарга яқин ерда помидор, бодринг, 165 гектар ерда ловия, мош каби дуккакли ўсимликлар, 12 гектарда соя ва кунгабоқар каби мойли экинлар, қолаверса, 800 гектардан ошиқ ерда бошқа турдаги озуқабоп маҳсулотлар агротехник талаблар асосида экиб етиштирилмоқда.

Вилоят ҳокимлиги матбуот хизмати