Бухоро вилояти ҳокимлиги

Хусусан, олис туманда танланган оғир аҳволдаги 5 та маҳалла, яъни “Давлатбой”, “Баланд мачит”, “Кўлчовдур”, “Ғанчи Чандир” ва “Хидрейли”  маҳаллаларида аҳоли томорқа ерларини суғориш, экин ерлари маҳсулдорлигини ошириш, тупроқ мелиоратив ҳолатини яхшилаш мақсадида умумий узунлиги 18,5 километр масофадаги ички сув йўллари ўзанини бетонлаштириш ишлари жадал бошланган. Дастурга биноан, “Бухоросувқурилишинвест” давлат муассасаси буюртмачилигидаги мазкур лойиҳа учун умумий қиймати 13 миллиард 85 миллион сўм маблағ ажратилган бўлиб, пудратчи ташкилотлар танланган.

Бугун вилоят ҳокими Боир Зарипов назорат тартибидаги навбатдаги ўрганишларини Олот туманида олиб бориб, жумладан, “Камбағалликдан фаровонлик сари” дастурига биноан ирригация тармоғида бажарилаётган ишларни кўздан кечирди. 

Аҳамиятли жиҳати, бу саъй-ҳаракат туфайли ҳудуддаги ўндан ортиқ фермер ҳамда деҳқон хўжалиги экин ери билан бирга 1 минг 844 та аҳоли хонадони, 3 минг 910 та оила тасарруфидаги қарийб минг гектар томорқа ер майдонини суғориш, “оби ҳаёт”га қондириш агротехник ишлари яхшиланади. 

Ҳолбуки, сўнгги йилларда мазкур маҳаллаларда айнан сув танқислиги кузатилгани сабабли қишлоқ хўжалиги маҳсулотлари экиб етиштиришда катта қийинчиликка дуч келингани ҳеч кимга сир эмас. Зеро, айни кунда бу маҳаллаларда ижтимоий ягона реестрига киритилган оила сони 346 тани ташкил этиб, сув таъминотини барқарор изга тушириш ортидан уларда томорқа еридан унумли фойдаланиш, экин ерини даромад манбаига айлантириш имконияти яратилади. Шунингдек, ҳудудга насос агрегатларини ўрнатиш ҳам кўзда тутилгани суғоришда экин ери эгалари учун айни муддао. 

Шу кунларда қайд қилинган маҳаллаларда масъулияти чекланган жамияти шаклидаги “Сардор элегант строй монтаж”, “Файзбек Ўғилой”, “Аму-Бухоро сув махсус таъмир”, “Когон нефт газ энерго сервис” каби механизациялашган пудратчи корхоналар иш олиб бормоқда.
Вилоят раҳбари туман ҳокимлиги, маъмурий секторлар бошлиқлари, агрокомплексга тегишли ташкилотлар мутасаддилари билан биргаликда кўздан кечирган дастлабки манзил “Кўлчовдур” маҳалласидан оқиб ўтувчи “Тармоқ-7” каналининг 6,5 километр қисмида бошланган иш бўлди. 

— Бу ерда “Когон нефт газ энерго сервис” МЧЖ нинг эксковатор, автосамосвал, бульдозер, каток, погрузчик каби ўндан ортиқ махсус техника воситасига эга жамоаси 10 февраль кунидан тупроқ ишларини бошлаган, – дейди “Олот сув етказиб бериш хизмати” ДМ директори Шерзод Шарипов. — Суғориш тармоғида ҳадемай бетонлаштиришга киришилади. Айнан 22 февраль ҳолатида бунда 920 метр куб ҳажмида тупроқ ишлари бажарилган. Муҳими, бетонлаштирилганидан сўнг сув ўтказиш ҳажми секундига 2 метр кубга етказиладиган каналдан нафақат Кўлчовдур, унга ёндош Ўзбекистон маҳалласи аҳолиси билан қўшганда, жами 5 мингтага яқин томорқачи хонадоннинг минг гектар томорқа ерини суғориш ишлари яхшиланади.

Ботир Зарипов ирригация-мелиорация ишлари суръати ва сифатини  ошириш, эрта баҳор олдидан хўжаликлар, аҳоли томорқаларида бошланган экин-тикин ишлари учун суғориш тармоқларини шай қилишга доир масъул мутасаддилар зиммасига қатор кечиктириб бўлмас вазифаларни юклади. 

Вилоят ҳокимлиги матбуот хизмати