Бухоро вилояти ҳокимлиги

Айни кунда чекка туманнинг ички йўл тармоғи узунлиги 1 минг 60 километрдан ошиқ бўлса, маҳаллий аҳолидан тушаётган мурожаат ва шикоятларни жойида ўрганган ҳолда 2024 йилда туман йўлсозлари жамоаси жонбозлиги туфайли ҳудудда тупроқли йўлнинг 100 километрдан ошиқ  қисми тўлиқ шағаллаштирилиб, йилнинг иккинчи даврида 15 километрга яқин йўл асфальтлаштирилган. 

Бугунга келиб туман Йўллардан фойдаланиш унитар корхонаси тасарруфида маҳаллий аҳамиятдаги умумфойдаланув автомобил йўли узунлиги 306 километрга тенг бўлиб, якунланган йилда умумий қиймати 3,5 миллиард сўмлик жорий таъмирлаш ишлари амалга оширилган. Шунингдек, қарийб 2,5 миллиард сўмга тенг сақлаш ишлари билан бир қаторда, йўлда ҳаракат хавфсизлигини таъминлаш мақсадида 550 метр пиёдалар йўлаги барпо қилинган. Қолаверса, юздан зиёд эскирган, яроқсиз йўл белгиси янгисига алмаштирилган. 

Бундан ташқари, пешкўлик йўлсозлар жамоаси туман ҳудудидаги жами 86 та кўприк созлигига ҳам бевосита масъул. Шу боис, ўтган йилда таъмирталаб ҳолга келган 6 та кўприкда қиймати 3 миллиард сўм атрофидаги қайта қуриш ва реконструкция ишлари амалга оширилиб, бу ишга тажрибали йўлсозлар жамоалари пудратчи сифатида жалб қилинган.
Шу кунларда яна бир пудратчи корхона ,,NEW TECH SAMARQANDʼʼМЧЖ томонидан туманнинг “Туркистон” МФЙ дан ўтувчи “4H-191”, “4H-189”, “4H-165”, “4H-190” русумли автомобил йўлларининг умумий 15,5 минг метр қисмини таъмирлаб, цемент-бетон қопламаси ётқизиш жараёни жадал бошланган. Бу лойиҳа билан бирга, ҳудуддаги таъмирталаб ва қайта қуриладиган 10 та кўприкни талаб даражасига келтириш ҳамда 12 та сув ўтказиш қувурини алмаштириш ҳам йўлсоз мутахассислар зиммасига юкланган.  

Вилоят ҳокимлиги матбуот хизмати