Бекобод шаҳри: имкониятларни амалий натижаларга айлантириш — бугуннинг муҳим талаби
2026-10-28 18:30:00 / Янгиликлар

Вилоят ва шаҳар ташкилотлари раҳбарлари, фаоллар, маҳалла еттилиги иштирокида ўтган мулоқотда 2026 йилнинг 9 ойи ва йил якуни бўйича белгиланган вазифалар ижроси, 2027 йилда амалга оширилиши лозим бўлган устувор вазифалар атрофлича муҳокама қилинди.
Хусусан, ҳудудда иқтисодий ўсишни таъминлаш, аҳоли бандлигини ошириш, камбағалликни қисқартириш, инвестицияларни жалб этиш ва экспорт ҳажмини кўпайтириш масалаларига алоҳида эътибор қаратилди.
Ушбу йўналишлардаги мавжуд муаммоларни аниқлаш, уларнинг ечимини топиш ҳамда белгиланган кўрсаткичларга эришиш юзасидан вилоят даражасидаги масъул раҳбарлар маҳаллаларга бириктирилди.
Бекобод шаҳрида жами 107 минг 600 нафардан зиёд аҳоли истиқомат қилади, хонадонлар сони 26 мингдан ортиқ. Шаҳарда 33 та маҳалла мавжуд.
2026 йил январь–сентябрь ойлари якунларига кўра, ишсизлик даражаси 4,2 фоизни (1 873 нафар), камбағаллик даражаси эса 3,6 фоизни (999 та оила, 3 880 нафар аҳоли) ташкил этган. Шунингдек, шаҳарда 149 та жиноят қайд этилган бўлиб, уларнинг 33 таси ёшлар, 8 таси аёллар ҳиссасига тўғри келади.
Давлат идораларига жами 2 380 та мурожаат келиб тушган, такрорий мурожаатлар улуши 9,1 фоизни ташкил этган.
Шунингдек, куз-қиш мавсумига тайёргарлик ишларининг ҳолати, дебитор қарздорликни бартараф этиш, ҳудудларни ободонлаштириш ва «Янги Ўзбекистон қиёфасидаги ҳудудлар» йўналишида амалга оширилаётган ишлар муҳокама қилинди.
Ижтимоий соҳа объектларининг қиш мавсумига тайёрлиги, таълим муассасаларида иситиш тизимлари ва зарур инфратузилманинг ҳолати, тиббиёт муассасаларининг мавсумга шайлиги ҳамда аҳолига кўрсатилаётган хизматлар сифатини ошириш масалалари ҳам кун тартибидан ўрин олди.
Вилоят ҳокими муҳокама қилинган ҳар бир йўналишнинг аҳоли турмуш фаровонлиги, ҳудудлар иқтисодий салоҳияти ва ижтимоий барқарорликни таъминлашдаги аҳамиятини таъкидлаб, раҳбарлардан мавжуд муаммоларга юзаки эмас, балки аниқ ҳисоб-китоб ва амалий ечимлар асосида ёндашишни талаб қилди.
Шаҳардаги маҳаллалар фаолияти таҳлил қилинганда, айрим ҳудудларда ижтимоий-иқтисодий кўрсаткичлар ҳануз қониқарсиз даражада қолаётгани маълум бўлди. Хусусан, рейтингнинг энг қуйи ўринларидан жой олган «Тинчлик», «Бирдамлик», «Туркистон», «Ёшлик» ва «Янги ҳаёт» маҳаллаларида аҳоли бандлигини таъминлаш, камбағалликни қисқартириш, тадбиркорликни ривожлантириш ҳамда инфратузилмани яхшилаш борасидаги ишларни кучайтириш зарур.
Йиғилишда, шунингдек, ёшлар билан ишлаш, уларнинг бандлигини таъминлаш, тарбияси оғир ёшлар билан манзилли ишлаш, хотин-қизларни қўллаб-қувватлаш ҳамда аҳоли учун маданий тадбирлар ва сайёр тиббий қабулларни ташкил этиш масалаларига ҳам эътибор қаратилди.
Таъкидланганидек, ҳар бир раҳбар ўз йўналиши бўйича белгиланган вазифалар ижроси, натижадорлик ва мавжуд муаммоларни бартараф этиш учун шахсан масъул ҳисобланади.
Белгиланган мақсадларга эришишда ижро интизоми, тизимли назорат ва амалий натижадорлик асосий мезон бўлиб хизмат қилиши лозим.









