Бекобод шаҳрини 2040 йилгача ривожлантириш концепцияси: шаҳарсозлик ва саноат тараққиёти бўйича уч томонлама меморандум имзоланди
2026-10-27 18:00:00 / Янгиликлар

2026 йил 27 октябрь куни Тошкент вилояти Бекобод шаҳар ҳокими Наримонжон Исмаилов Хитойнинг «China State Construction» корпорацияси директорлар кенгаши раиси Гао Бо билан учрашди. Учрашувда Бекобод шаҳрини 2040 йилгача ривожлантириш, «Ўзметкомбинат» АЖни модернизация қилиш ва шаҳарнинг истиқболли бош режаси концепцияси юзасидан музокаралар ўтказилди.
Мулоқот давомида шаҳарнинг мавжуд иқтисодий ва географик имкониятларидан самарали фойдаланиш, саноатни диверсификация қилиш, савдо ва логистика инфратузилмасини ривожлантириш, шунингдек, аҳоли учун қулай яшаш муҳитини шакллантириш масалаларига эътибор қаратилди.
Шаҳарни ривожлантириш концепцияси «икки ядро, икки қанот» моделига асосланган бўлиб, унда эски шаҳар ҳудудини янгилаш, янги шаҳарни ривожлантириш ва келгусида шаҳарнинг шимоли-ғарбий йўналишда кенгайишини таъминлаш таклиф этилган. Концепцияга мувофиқ, эски шаҳар уй-жой, таълим, транспорт ва ободонлаштириш маркази сифатида ривожлантирилиши, янги шаҳарнинг инновацион ядросида эса маъмурий бошқарув, бизнес ва юқори технологияли ишланмалар учун шароит яратилиши кўзда тутилган.
Шаҳарнинг иқтисодий ўсишини таъминлашда саноатни модернизация қилиш ва ишлаб чиқариш занжирини такомиллаштириш муҳим ўрин тутади. Хусусан, «Ўзметкомбинат» фаолиятини модернизация қилиш, пўлатни чуқур қайта ишлаш, замонавий ускуналар ишлаб чиқариш ҳамда илмий-тадқиқот йўналишларини ривожлантириш концепциянинг асосий йўналишларидан ҳисобланади. Шу билан бирга, саноат туризми имкониятларидан фойдаланиш ҳам таклиф этилмоқда.
Бекободнинг чегараолди ҳудудида жойлашгани ҳам шаҳар тараққиёти учун муҳим омил сифатида баҳоланмоқда. Концепцияда чегара орқали савдо, божхона инфратузилмаси, логистика ва қурилиш материаллари савдосини ривожлантириш орқали янги иқтисодий имкониятларни шакллантириш назарда тутилган. Бу йўналишлар шаҳарда тадбиркорлик ва хизмат кўрсатиш соҳаларини кенгайтириш учун замин яратиши мумкин.
Шаҳарнинг табиий салоҳиятидан самарали фойдаланиш ҳам режанинг муҳим қисмидир. Хусусан, Сирдарё соҳилида замонавий жамоат ҳудудлари, сайр йўлаклари, дам олиш масканлари ва маданий-туристик объектларни ташкил этиш таклиф қилинган. Янги шаҳар ҳудудида эса экологик жиҳатдан қулай турар жойлар, маданият ва савдо масканлари, юқори технологияли саноат ҳудудлари ҳамда табиатни муҳофаза қилиш ва дам олиш зоналарини барпо этиш кўзда тутилган.
Концепциядаги стратегик мақсадлардан бири — Бекободни саноат, савдо ва хизмат кўрсатиш соҳалари уйғун ривожланган замонавий шаҳарга айлантиришдир. Унда шаҳар аҳолисининг сонини 100 мингдан 170 минг кишигача етказиш, эски ва янги шаҳар ўртасида ягона транспорт тармоғини шакллантириш, йўл инфратузилмасини такомиллаштириш ҳамда аҳоли учун қулай яшаш шароитларини яратиш каби истиқболли вазифалар белгиланган.
Шунингдек, савдо ва хизматлар кўламини кенгайтириш, янги иқтисодий имкониятларни юзага келтириш ва аҳоли истеъмол эҳтиёжларининг кўпроқ қисмини шаҳарнинг ўзида қондириш орқали Бекобод шаҳрининг иқтисодий жозибадорлигини ошириш мақсад қилинган.
Тақдим этилган концепция шаҳарни 2040 йилгача ривожлантиришнинг истиқболли йўналишларини белгилаб беради. Айни пайтда у концептуал таклифлар мажмуаси бўлиб, лойиҳаларни амалга оширишнинг аниқ параметрлари, молиявий кўрсаткичлари ва муддатлари тегишли қарорлар ҳамда кейинги лойиҳалаш ишлари жараёнида белгиланади.
Учрашув якунида Бекобод шаҳар ҳокимлиги, «Ўзметкомбинат» АЖ ва «China State Construction» корпорацияси ўртасида уч томонлама меморандум имзоланди. Ҳужжат шаҳарнинг узоқ муддатли ривожланиш йўналишлари бўйича ҳамкорликни йўлга қўйиш ва истиқболли ташаббусларни илгари суришда муҳим қадам бўлди.
Учрашувдан сўнг Хитой делегацияси вакиллари Бекобод шаҳридаги қатор ижтимоий объектлар фаолияти билан яқиндан таништирилди. Хусусан, меҳмонлар Нўмон ибн Собит жоме масжиди ва унинг ҳудудида ташкил этилган кутубхона, шунингдек, «Тумарис скул» нодавлат таълим муассасасида бўлиб, мазкур масканларда яратилган шароитлар ҳақида маълумот олдилар.
Делегация вакилларининг Дўстлик маҳалласига ташрифи давомида эса Ўзбекистонда маҳалла институтининг ўзига хос ўрни, «маҳалла еттилиги» тизимининг фаолияти ва аҳоли билан ишлаш механизмлари ҳақида атрофлича тушунтириш берилди. Шунингдек, меҳмонлар кўп қаватли уй-жойларни сақлаш, уларга хизмат кўрсатиш ҳамда аҳолини коммунал хизматлар билан таъминлашга ихтисослашган бошқарув сервис компанияси фаолияти билан ҳам таништирилди.









