Тошкент вилояти Бекобод тумани ҳокимлиги

30 июнь — Ёшлар куни муносабати билан Бекобод туманида кўтаринки руҳдаги байрам тадбири ташкил этилди. Тадбир ёшларни эътироф этиш, уларнинг ютуқларини рағбатлантириш ҳамда жамиятдаги фаоллигини янада оширишга қаратилгани билан аҳамиятли бўлди. Байрам тадбирида Бекобод тумани ҳокими иштирок этиб, барча ёшларни самимий қутлади ҳамда уларга келгуси фаолиятларида улкан муваффақиятлар тилади. Шунингдек, ёшлар эришаётган натижалар юрт тараққиёти ва келажаги учун муҳим омил эканини таъкидлади. Тадбир давомида 2025–2026 ўқув йилида умумий ўрта таълим муассасаларини 2 438 нафар битирувчи тамомлагани, улардан 27 нафари муддатидан олдин олий таълим муассасаларига талабаликка қабул қилингани алоҳида эътироф этилди. Бундан ташқари, мактабни 47 нафар олтин ва 7 нафар кумуш медаль билан тамомлаётган ўқувчилар тантанали равишда тақдирланди. Шунингдек, умумтаълим мактаблари ўқувчилари ўртасида математика, инглиз тили ва информатика фанлари бўйича ўтказилган «Ҳоким олимпиадаси» ҳамда «IT Билимдони» танловлари ғолиблари ҳам муносиб рағбатлантирилди. Байрам тадбирида турли соҳаларда самарали фаолият юритаётган энг фаол ёш ходимлар ҳам эътироф этилиб, фахрий ёрлиқ ва эсдалик совғалари билан тақдирланди. 27 июнь — Матбуот ва оммавий ахборот воситалари ходимлари куни муносабати билан бир гуруҳ журналистлар, матбуот ходимлари ҳамда блогерларга ҳам эҳтиром кўрсатилди. Тадбирнинг иккинчи қисми туман марказий ўйингоҳида давом этди. Байрам концертида ёш санъаткорлар ва таниқли эстрада хонандалари иштирок этиб, Ватан, тинчлик, дўстлик ва ёшликни мадҳ этувчи қўшиқларни ижро этдилар. Ёшлар — Янги Ўзбекистон бунёдкорлари! Бекобод ёшлари ўз билимлари, ташаббуслари ва ютуқлари билан бу ишончни амалда намоён этиб келмоқда.