ҲАР БИР МУРОЖААТ ЭЪТИБОРДА, ҲАР БИР МУАММО ЕЧИМИ МАСЪУЛЛАР НАЗОРАТИДА! Бандихон туманида Сурхондарё вилояти прокурори ўринбосари Шарофиддин Акрамовнинг фуқаролар билан сайёр қабули ўтказилди.
2026-11-12 10:00:00 / Янгиликлар

Халқ билан мулоқот қилиш, фуқароларни қийнаётган муаммоларни бевосита жойида ўрганиш, уларнинг қонуний ҳуқуқ ва манфаатларини таъминлаш давлат идоралари олдидаги энг муҳим вазифалардан биридир. Зеро, ҳар бир мурожаат ортида инсон тақдири, оилавий ташвиш, ҳал этилишини кутаётган муаммо ва адолатга бўлган ишонч мужассам.
Ана шу мақсадда Бандихон туманидаги 17-сонли болалар мусиқа ва санъат мактаби биносида Сурхондарё вилояти прокурори ўринбосари Шарофиддин Акрамов иштирокида сайёр қабул ташкил этилди.
Қабул давомида фуқароларнинг мурожаатлари бирма-бир тингланиб, уларни қийнаётган муаммолар, мавжуд камчиликлар ва ечимини кутаётган масалалар атрофлича муҳокама қилинди. Хусусан, фуқаролар ҳуқуқни муҳофаза қилувчи органлар фаолияти ҳамда бошқа соҳаларга оид жами 31 та масала юзасидан ўз мурожаатларини билдирдилар.
Сайёр қабулда туман ҳокими Абдумалик Алламурадов, туман прокурори Бобур Тошпулатов, туман ИИБ бошлиғи Жўрабек Тўраев ҳамда тегишли ташкилот ва идоралар раҳбарлари иштирок этди.
Энг муҳими, мурожаатларни шунчаки тинглаш билан чекланиб қолмасдан, ҳар бир масаланинг мазмун-моҳиятини чуқур ўрганиш, қонуний ечимини топиш ва фуқароларни қийнаётган муаммоларни бартараф этишга алоҳида эътибор қаратилди.
Қабул давомида кўтарилган масалаларни ҳал этиш юзасидан тегишли масъулларга аниқ вазифалар белгилаб берилди. Мурожаатларнинг ижросини таъминлаш, уларнинг ҳар бири бўйича қонунчиликда белгиланган тартибда тегишли чоралар кўриш ҳамда натижаси ҳақида фуқароларга асослантирилган жавоб бериш вазифаси юклатилди.
Бандихон тумани ҳокимлиги
Ахборот хизмати









