Бандихонда қишлоқ хўжалиги соҳасида самарадорликни ошириш, ҳосилдорликни кўпайтириш ҳамда келгуси мавсумга пухта тайёргарлик кўриш борасидаги ишлар ҳолати ўрганилди
2026-04-18 14:00:00 / Янгиликлар
Сурхондарё вилоятида аграр соҳани барқарор ривожлантириш, ер майдонларидан оқилона фойдаланиш ва замонавий агротехнологияларни кенг жорий этиш бугунги куннинг устувор вазифаларидан бири бўлиб қолмоқда. Шу мақсадда ҳудудларда амалга оширилаётган ишлар тизимли равишда ўрганилиб, амалий чоралар кўрилмоқда.
Шу жараёнлар доирасида вилоят ҳокими Улуғбек Қосимов Бандихон туманига ташриф буюриб, қишлоқ хўжалиги соҳасида амалга оширилаётган ишлар билан яқиндан танишди. Ташриф тумандаги “Омад” фермер хўжалиги даласида ташкил этилиб, унда соҳа мутахассислари, фермерлар ва масъул раҳбарлар иштирок этди.
Учрашув давомида 2026-йил ҳосилига мустаҳкам замин яратиш масалалари атрофлича муҳокама қилинди. Хусусан, Шинжон усулида экилган майдонларда чигитнинг сифатли униб чиқишини таъминлаш, томчилатиб суғориш технологияларидан самарали фойдаланиш ва уларнинг самарадорлигини ошириш бўйича аниқ вазифалар белгилаб берилди.
Бундан ташқари, дала четларига “инвитро” усулида етиштирилган кўчатларни экиш, ловия ва мош каби дуккакли экинлар майдонини кенгайтириш орқали ер унумдорлигини ошириш масалалари ҳам эътибор марказида бўлди.
Учрашувда ғалла майдонларига қўшимча минерал ўғитлар бериш, суғориш ишларини тизимли йўлга қўйиш, зараркунанда ва касалликларга қарши самарали курашиш, шунингдек, чигит экилган майдонларда биринчи комплекс ишлов бериш ишларини ўз вақтида амалга ошириш муҳим вазифалар сифатида белгиланди.
Шу билан бирга, мавжуд ғалла ўриш комбайнларини мавсумга шай ҳолатга келтириш, янги техникаларни харид қилиш, пахта териш машиналари паркини кенгайтириш, пилла етиштиришни ривожлантириш ҳамда пиллахоналарда зарур шароитларни яратиш юзасидан масъулларга аниқ топшириқлар берилди.
Бундай амалий ёндашувлар ва жойларда олиб борилаётган тизимли ишлар Бандихон туманида қишлоқ хўжалиги самарадорлигини ошириш, юқори ҳосил олиш ҳамда аҳоли фаровонлигини юксалтиришга хизмат қилиши билан аҳамиятлидир.
Маълумот учун: "Омад" фермер хўжалиги даласида "Шинжон" усулида томчилатиб суғориш технологияси асосида 12 гектар чигит экилган. 10 гектар ғалла майдонида ёмғирлатиб суғориш технологияси жорий қилинган. Чорва моллари, паррандачилик, асаларичилик ва ўрдакчилик ташкил этилган.