Инсон қадри ва халқ манфаати йўлида: Бандихонда яна бир кўчага асфалт ётқизилмоқда
2026-03-25 16:00:00 / Янгиликлар
Давлатимиз раҳбари томонидан Сурхондарё вилоятини ҳар томонлама ривожлантириш, ҳудудларда аҳоли турмуш даражасини яхшилаш ҳамда инфратузилмани янада мустаҳкамлаш борасида берилаётган алоҳида эътибор ўз самарасини бермоқда. Натижада вилоятнинг барча ҳудудларида кенг кўламли бунёдкорлик ишлари изчил давом этмоқда.
Хусусан, Бандихон туманининг Обикор маҳалласи Порлоқ йўл ва Шабада кўчасининг 1500 метр қисмида туман ободонлаштириш бошқармаси томонидан асфалт қопламасини ётқизиш ишлари бошлаб юборилди. Мазкур ишлар ҳудуд аҳолиси учун узоқ йиллардан буён муаммо бўлиб келган ички йўлларнинг ҳолатини яхшилашга хизмат қилмоқда.
Маълумки, айрим ички йўлларнинг таъмирга муҳтожлиги сабаб ёз фаслида чанг, қиш мавсумида эса лой бўлиши маҳалла аҳолисига қатор ноқулайликлар туғдириб келаётган эди. Бугунги кунда ушбу муаммоларга босқичма-босқич барҳам берилаётгани эса фуқаролар томонидан катта мамнуният билан кутиб олинмоқда.
Ҳудудларда амалга оширилаётган бундай ободонлаштириш ва инфратузилма ишлари Бандихон туманининг ижтимоий-иқтисодий ривожланишида муҳим аҳамият касб этиб, аҳоли учун янада қулай ва муносиб турмуш шароитларини яратишга хизмат қилмоқда.
⚡️Эслатиб ўтамиз, маҳаллаларнинг ички кўчаларини тошлаш ва асфалтлаш ишлари тасдиқланган режа асосида кетма-кетликда давом эттирилади.