Бандихонлик нуронийлар ва меҳнат фахрийлари “Ислом цивилизацияси” марказини зиёрат қилмоқда
2026-03-07 11:00:00 / Янгиликлар
Бандихон туманидаги бир гуруҳ нуронийлар ва меҳнат фахрийлари пойтахтимиздаги муҳташам илмий-маърифий маскан — Ислом цивилизацияси маркази билан яқиндан танишмоқда.
Мазкур марказ халқимизнинг бой тарихий-маданий мероси, буюк алломаларимизнинг илм-фан ривожига қўшган улкан ҳиссаси ҳамда ислом тамаддунининг юксак қадриятларини кенг жамоатчиликка етказиш мақсадида барпо этилган. Саёҳат давомида нуронийлар марказнинг замонавий архитектураси, бой экспозициялари ҳамда ноёб тарихий манбаларни ўзида жамлаган кўргазма заллари билан танишдилар.
Фахрийлар бу ерда аждодларимиз — буюк муҳаддислар, олимлар ва мутафаккирларнинг илмий мероси ҳақида батафсил маълумотларга эга бўлиб, қадимий қўлёзмалар, тарихий ашёлар ва интерактив экспозицияларни катта қизиқиш билан томоша қилдилар. Шунингдек, марказ фаолияти орқали ёш авлодни миллий ва маънавий қадриятларга ҳурмат руҳида тарбиялаш йўлида амалга оширилаётган ишлар билан ҳам танишдилар.
Нуронийлар юртимизда тарихий меросни асраб-авайлаш, уни келгуси авлодларга етказиш ҳамда миллий ўзлигимизни янада мустаҳкамлаш йўлида амалга оширилаётган бундай эзгу ташаббусларни юксак баҳолаб, ташкил этилган саёҳат учун ўз миннатдорликларини билдирдилар.
Бундай маърифий саёҳатлар нуронийларнинг мазмунли ҳордиқ чиқаришлари, уларнинг ҳаётий тажрибасидан баҳраманд бўлиш ҳамда жамиятда кексаларни эъзозлаш анъаналарини янада мустаҳкамлашга хизмат қилмоқда.
Бандихон тумани ҳокимлиги
Ахборот хизмати