Айни вақтда “Мустақил Ўзбекистон — 35 йиллик тараққиёт йўли: ислоҳотлар, натижалар ва истиқболлар” мавзусидаги халқаро илмий-амалий конференция давом этмоқда.
2026-08-14 14:00:00 / Вазирлик янгиликлари
Конференцияда адлия вазири Акбар Ташкулов маъруза қилиб, мустақиллик йилларида Ўзбекистон ҳуқуқий тизимида амалга оширилган ислоҳотлар, эришилган натижалар ҳамда келгусидаги устувор вазифаларга тўхталди.
Адлия вазири маърузасидан асосий тезислар:
Ўзбекистон мустақиллигининг 35 йиллик тараққиёт йўли давлат мустақиллигини мустаҳкамлаш, миллий ҳуқуқ тизимини шакллантириш ҳамда инсон қадри, ҳуқуқ ва эркинликларини давлат сиёсатининг марказига олиб чиқиш даври бўлди.
Сўнгги ўн йилликда ҳуқуқий давлат ғояси назарий тамойилдан кундалик давлат бошқарувининг муҳим мезонига айланди.
2023 йилда умумхалқ референдуми асосида қабул қилинган янги таҳрирдаги Конституцияда Ўзбекистоннинг ҳуқуқий, ижтимоий ва дунёвий давлат экани қатъий белгиланди.
Инсон ҳуқуқ ва эркинликларининг бевосита амал қилиши, қонунчиликдаги зиддият ва ноаниқликларнинг инсон фойдасига талқин этилиши конституциявий принцип сифатида мустаҳкамланди.
Суд-ҳуқуқ тизимида шахс ҳуқуқларини кафолатлаш, қийноқларнинг олдини олиш, мажбурий меҳнатга барҳам бериш, хотин-қизлар ва болалар ҳуқуқларини ҳимоя қилиш бўйича қонунчилик ва амалиёт тубдан янгиланди.
Қонун ижодкорлигининг очиқлиги оширилиб, ҳужжатлар лойиҳаларини жамоатчилик муҳокамасидан ўтказиш, тартибга солиш таъсирини баҳолаш ва коррупцияга қарши экспертиза қилиш механизмлари кенг жорий этилди.
Эндиликдаги асосий вазифа қонунлар сонини кўпайтириш эмас, балки уларнинг сифати, барқарорлиги ва амалда ишлашини таъминлашдир. Эскирган ва ортиқча талабларни бекор қилиш, фуқаролар ва бизнес учун ҳуқуқий тартиб-таомилларни соддалаштириш ишлари давом эттирилмоқда.
Давлат хизматларининг асосий қисми электрон шаклга ўтказилиб, фуқаролардан давлат органларида мавжуд маълумотларни қайта талаб қилиш амалиёти босқичма-босқич бекор қилинмоқда.
2026 йилнинг биринчи ярмида 460 мингдан ортиқ нотариал ҳаракат масофадан туриб расмийлаштирилди. Давлат хизматларининг 90 фоизи онлайн шаклда кўрсатилмоқда.
Келгуси босқичда низоларни судгача ҳал этиш, медиация ва бошқа муқобил механизмларни кенгайтириш, профессионал юридик ёрдам сифатини ошириш устувор вазифалардан бўлиб қолади.
Сунъий интеллект, рақамли иқтисодиёт ва трансчегаравий муносабатлар ҳуқуқ тизими олдига янги вазифаларни қўймоқда. Сунъий интеллект ва LegalTech имкониятларидан фойдаланган ҳолда янги авлод ҳуқуқий экотизимини шакллантириш мақсад қилинган.
“Бизнинг мақсадимиз — шундай ҳуқуқий тизимни барпо этишки, унда қонун инсон учун мураккаб тўсиқ эмас, балки унинг ҳуқуқ ва манфаатларини ҳимоя қиладиган ишончли восита бўлсин.”