Германия халқаро ҳуқуқий ҳамкорлик жамғармаси (IRZ) билан ҳамкорликда Маъмурий жавобгарлик тўғрисидаги кодекснинг янги таҳририни ишлаб чиқишга бағишланган семинар бўлиб ўтди.
2026-05-20 12:00:00 / Вазирлик янгиликлари
Аввал хабар берилганидек, 19–20 май кунлари Адлия вазирлигида Германия халқаро ҳуқуқий ҳамкорлик жамғармаси (IRZ) билан ҳамкорликда Маъмурий жавобгарлик тўғрисидаги кодекснинг янги таҳририни ишлаб чиқишга бағишланган халқаро семинар бўлиб ўтди.
Хусусан, Германиянинг маъмурий ҳуқуқбузарлик соҳасидаги илғор тажрибаси, ҳуқуқни қўллаш амалиёти ва маъмурий жавобгарликни тартибга солишнинг самарали механизмлари юзасидан фикр алмашилди.
Шунингдек, Германия суд-ҳуқуқ тизимида кўп йиллик тажрибага эга бўлган халқаро эксперт Вольфганг Зиверт томонидан Германия маъмурий жавобгарлик ҳуқуқининг ўзига хос хусусиятлари, хусусан, маъмурий ва жиноий жавобгарлик ўртасида чегараларни белгилаш, маъмурий органлар ва судлар ўртасида ваколатларни тақсимлаш ҳамда суд назоратининг самарали механизмлари тўғрисида маълумот берилди.
Бундан ташқари, Германия ва Ўзбекистонда маъмурий ҳуқуқбузарликларни кўриб чиқиш жараёнлари амалиётдаги аниқ кейслар мисолида муҳокама қилинди, шунингдек, Германияда маъмурий жавобгарлик тизимида юридик шахслар ва якка тартибдаги тадбиркорларнинг жавобгарлиги, маъмурий органлар томонидан ишларни мутаносиблик принципи асосида кўриб чиқиш масалалари ҳамда маъмурий иш юритишни рақамлаштириш юзасидан фикр алмашилди.
Таъкидлаш жоизки, семинар доирасида адлия вазирининг биринчи ўринбосари М. Истамов Германия халқаро ҳуқуқий ҳамкорлик жамғармасининг (IRZ) Ўзбекистондаги лойиҳалари раҳбари Ф. Хупфельд билан мулоқот ўтказди.
Суҳбат давомида Ўзбекистон Республикаси Адлия вазирлиги ва Германия халқаро ҳуқуқий ҳамкорлик жамғармаси (IRZ) ўртасида 2026 йилнинг иккинчи ярмига мўлжалланган ҳамкорлик йўналишлари муҳокама қилинди.
Семинар якунида Маъмурий жавобгарлик тўғрисидаги кодекснинг янги таҳририни ишлаб чиқишга қаратилган амалий таклиф ва тавсиялар ишлаб чиқилди.