Адлия вазирлигида ижро интизомини мустаҳкамлаш масалаларига бағишланган ўқув-семинар бўлиб ўтди
2026-01-22 17:00:00 / Вазирлик янгиликлари
Бугун Адлия вазирлигида вазирлик, идора ва маҳаллий ҳокимликларнинг ижро интизомига масъул раҳбарлари ва ходимлари иштирокида давлат органлари ва ташкилотларида ижро интизомини таъминлаш, Президент ва Ҳукумат ҳужжатларида белгиланган топшириқлар ижросини самарали ташкил этиш масалаларига бағишланган ўқув-семинар бўлиб ўтди.
Семинарда Ўзбекистон Республикаси Президенти ва Президент Администрацияси раҳбари ҳужжатлари, шунингдек, Вазирлар Маҳкамаси қарорларида белгиланган топшириқлар ижросининг 2025 йилдаги ҳолати таҳлил қилиниб, ижро интизомини янада мустаҳкамлаш бўйича устувор вазифалар муҳокама қилинди.
Таъкидланганидек, ижро интизомини кучайтириш борасида сўнгги йилларда қатор тизимли чоралар кўрилмоқда. Хусусан, “Ijro.gov.uz” ахборот тизимида сунъий интеллект асосида топшириқларнинг такрорийлигини аниқлаш, ижро муддати яқинлашаётган топшириқлар бўйича раҳбарларни автоматик хабардор қилиш механизмлари жорий этилди. Мазкур тизим давлат органларининг 13 та ахборот тизими билан интеграция қилиниб, назорат жараёнларининг очиқлиги ва тезкорлигини таъминламоқда.
Шунингдек, Ҳисоб палатаси билан ҳамкорликда ҳудудларда доимий фаолият юритувчи ишчи гуруҳлар ташкил этилиб, жойларда топшириқлар ижроси ўрганилди ва амалий ёрдам кўрсатилди. Натижада минглаб топшириқлар ижроси жойига чиққан ҳолда мониторинг қилиниб, уларнинг сезиларли қисми белгиланган муддатларда бажарилиши таъминланди.
Тадбир якунида ижро интизомини янада мустаҳкамлаш, назорат ва ҳисобдорлик механизмларига қатъий риоя этиш, нотўғри маълумотлар киритиш орқали топшириқларни ёпиш ҳолатларига нисбатан жавобгарликни кучайтириш бўйича аниқ таклифлар илгари сурилди.