O‘zbekiston Respublikasi Suv хo‘jaligi vazirligi

“UZINFOCOM” MCHJ bilan hamkorlikda ishlab chiqilgan ushbu tizim suv yetkazib beruvchi tashkilotlar va suv iste’molchilari o‘rtasida rasmiylashtirilgan dalolatnomalarni har oy yakuni bilan elektron shaklda to‘ldirish hamda elektron raqamli imzo orqali tasdiqlash hamda ular to‘g‘risidagi ma’lumotlar bazasini shakllantirish imkonini beradi. Ushbu yangi tizim Yozyovon tumanida test-sinov rejimida ishga tushirildi.

Sirdaryo-So‘x irrigatsiya tizimlari havza boshqarmasida soha mutaxassislari ishtirokida tizimdan foydalanuvchilar uchun seminar bo‘lib o‘tdi. Ishtirokchilarga “Suv hisobi” axborot tizimi haqida atroflicha ma’lumot berildi.

Ta’kidlanganidek, avvallari 100 mingdan ortiq iste’molchilar bilan suv yetkazib berish bo‘yicha shartnomalarni tuzish, olingan suv to‘g‘risida dalolatnomalarni rasmiylashtirish ishlari qo‘lda va qog‘ozda bajarilgan. Endilikda suv iste’molchilari kesimida suvning hisobi va hisobotini yuritish ishlari faqatgina mazkur tizim orqali amalga oshiriladi.

– Mazkur tizim fermer xo‘jaliklari va klasterlarga suv yetkazib berish bo‘yicha suv xo‘jaligi tashkilotlari bilan tegishli hujjatlarni elektron tarzda tuzish va olingan suv to‘g‘risida dalolatnomalarni rasmiylashtirish hamda yetkazib berilgan suv miqdorini shaffof tarzda doimiy nazorat qilib borish imkoniyatini beradi, – dedi Suv xo‘jaligi vazirligi Budjet tizimi budjet mablag‘larini raqamli texnologiyalar yordamida tahlil qilish bo‘limi boshlig‘i Nail Galipshin. – Bundan tashqari, iste’molchilar kesimida suv resurslarini o‘z vaqtida va adolatli taqsimlash mumkin bo‘ladi.

Mazkur axborot tizimi, O‘zbekiston Respublikasi Soliq qo‘mitasining tegishli axborot tizimlariga integratsiya qilinib, suv iste’molchilari kesimida ishlatilgan suv resurslari to‘g‘risidagi ma’lumotlarning soliq bazasi shakillantiriladi.

Seminar ishtirokchilari Yozyovon tumanida bo‘lib, “Suv hisobi” axborot tizimidan foydalanish jarayonlarini ham kuzatishdi.

Sirdaryo-So‘x ITHB matbuot xizmati