Kichik  biznes  har  qanday  mamlakatda  iqtisodiy o‘sish  va  innovatsiyalarning dvigatelidir.  Ular  ish o‘rinlari  yaratish,  raqobatni  kuchaytirish  va  mamlakatning umumiy farovonligiga  hissa  qo‘shishda  hal  qiluvchi  rol o‘ynaydi.  Tadbirkorlik faoliyatini    boshlash    va    uni    boshqarish    jarayoni    kichik    biznes rivojlanishining tayanchidir.O‘zbekistonda ijtimoiy yo‘naltirilgan bozor iqtisodiyotini barpo   etishning   asosiy   maqsadlaridan biri   kichik   biznesni   ustuvor   darajada rivojlantirishdan  iborat.  Bu  maqsadni  amalga  oshirish  uchun  bosqichma-bosqich iqtisodiy islohotlar o‘tkazilib kelinmoqda, kichik biznesning rolini oshirish uchun yirik institusional  asoslar  yaratildi.  Kichik  biznes  faoliyatini  tashkil  etish,  erkin  faoliyat yuritishini kafolatlovchi huquqiy-me’yoriy hujjatlar, kichik biznesga ko‘maklashuvchi bozor  infratuzilmasi  shakllantirildi.  Natijada  bugungi  kunga  kelib,  kichik  biznes sub’yektlari  mamlakatimiz  iqtisodiyotining  barcha    jabhalarida,    mashinasozlik mahsulotlarini  ishlab  chiqarishda,  iste’mol  tovarlari,  qishloq  xo‘jaligi  va  oziq-ovqat mahsulotlarini ishlab chiqarishda, servis xizmatlari ko‘rsatish va turizm kabi sohalarda faoliyat  ko‘rsatmoqdalar. 2022-2026-yillarga mo‘ljallangan Yangi O‘zbekistonning taraqqiyot strategiyasining 29-maqsadiga ko‘ra,  tadbirkorlik faoliyatini  tashkil  qilish  va  doimiy daromad manbalarini shakllantirish uchun sharoitlar yaratish, xususiy sektorning Yalpi ichki  mahsulotdagi  ulushini  80  foizga  va  eksportdagi  ulushini  60  foizga  yetkazish belgilangan. Muhim vazifalar sifatida hududlarda 200 ta yangi sanoat zonalarini tashkil etish  va  biznes-inkubatorlar  tizimini  rivojlantirish,  sharoiti  og‘ir  bo‘lgan  tumanlarda tadbirkorlikni  rivojlantirish  uchun  yanada  qulay  shart-sharoitlar  yaratish,  hududlarda tadbirkorlikni  qo‘llab-quvvatlash,  ishsizlik  va  kambag‘allikni  qisqartirish  bo‘yicha mavjud   tuzilmalar   faoliyatini   takomillashtirish,   iqtisodiyotda   davlat   ishtirokini qisqartirish va xususiy sektorga keng yo‘l ochish, iqtisodiy munosabatlarda erkin bozor tamoyillarini    joriy etishni kengaytirish    kabilar    alohida    belgilab    qo‘yilgan. Mamlakatimiz  hududlarida  kambag‘allikni  qisqartirish  va  aholi  bandligini  oshirish, o‘zini-o‘zi band qilishda kichik biznes va xususiy tadbirkorlikni yanada rivojlantirish muhim   ahamiyatga  ega. Mamlakatimizda   kichik  biznesni   rivojlantirish  bo‘yicha to‘plangan  tajribalar   shuni   ko‘rsatadiki,   korxonalarning   raqobatdoshlik  darajasini oshirish ularning o‘z faoliyatlari davomida kengayib, yiriklashib borishini taqozo etadi. 

 M.Sattorov
Sho‘rchi tuman statistika bo‘limi boshlig‘i