“Биз бир бўлсак – ягона халқмиз, бирлашсак – Ватанмиз!”

Мудофаа вазирлиги ташаббуси билан “Биз бир бўлсак – ягона халқмиз, бирлашсак – Ватанмиз!” шиори остида барча ҳудудларда ташкил этилаётган ҳарбий-ватанпарварлик мусобақаларининг Сирдарё вилоят босқичи ўтказилди.

Мирзаобод туманидаги ҳарбий қисмда вилоят ҳокимлиги, вилоят Ёшлар ишлари бошқармаси, Ўзбекистон ёшлар иттифоқи вилоят Кенгаши ҳамда вилоят Спорт бошқармаси ҳамкорлигида мажмуавий спорт мусобақаларининг вилоят босқичи кўтаринки руҳда ўтказилди.

Ташкил этилган мусобақа оталиққа олинган ёшларни ҳарбий-амалий спорт мусобақаларига кенг жалб қилиш, ўзаро маданий-спорт алоқаларни йўлга қўйиш, интеллектуал салоҳиятини ошириш, энг асосийси, ҳаётда билиб-билмай тўғри йўлдан адашган ёшларни тўғри йўлга қайтаришга кўмаклашишдан иборат.

Унда ёшлар “Ҳарбийлаштирилган спорт эстафетаси”, “Арқон тортиш”, “Заковат”, “Куч машқи” ҳамда “Мусиқий батл” шартлари бўйича дўстона беллашдилар.

Якуний натижаларга кўра, ўринлар қуйидагича тақсимланди:

1-ўрин —Сардоба тумани жамоасига;

2-ўрин —Сирдарё тумани жамоасига;

3-ўрин — Ховос тумани жамоасига насиб қилди.

Ғолиб ва совриндорлар қимматбаҳо совғалар ҳамда диплом билан тақдирланди. Ғолиб жамоа мусобақанинг Республика босқичида иштирок этади.