Óner menen tabılǵan bereket
2026-08-06 10:00:00 / Министрлик
Xojeli rayonındaǵı Qumbız awıl MPJ jasawshı Húrliman Qalbaeva búgingi kúnde ózin-ózi bánt etip, kempir apalarımızdan miyras bolıp qalǵan quraq quraw ónerin óz ómirinde jalǵastırıp, shańaraǵına dáramat tawıp otırǵan ónerment qız. Anasınıń ápiwayı tigiw mashinasında tigislerdi tigip, hár qıylı shıraylı quraqlardı qurap otırǵanın kórip ósken Húrlimannıń da bul ónerge degen qızıǵıwshılıǵı artıp, kishkene gezinde-aq, óziniń quwırshaǵına kóylek tigiwdi úyrenedi. Qızınıń tigiwshilikke degen uqıbın kórgen anası Gúlnara onı Xojelidegi tigiw cexına alıp barıp, sheber tigiwshiler bolǵan Zina hám Dilrawshan ustazlarına shákirtlikke beredi. Ustazlarınan tigiwshiliktiń sırların qunt penen úyrengen Húrliman hayal-qızlardıń kóyleklerin piship hám tigiwdi dárhal meńgerip aladı. Názik talǵamlı hayal-qızlardıń kóyleklerin olardıń kewlindegidey etip tigiwdi úyrengen ol sol jerde quraq qurawdıń sırların da sheberlik penen meńgeredi.
– Quraq quraw sheberlikti, sabırlılıqtı talap etetuǵın óner. Sebebi, ólshemler birdey bolıp shıqpasa quraq jaqsı shıqpaydı. Tigiw cexında islep júrgen gezlerimde kóbinese qız uzatıw toylarına qızdıń júgi ushın quraq kórpeshelerge buyırtpa túsetuǵın edi. Házirgi waqıtta da buyırtpashılardıń kewlinen shıqqanday etip quraq qurap, sonday-aq, shımıldıq quraq ta tigip buyırtpashılardıń kewlinen shıǵıwǵa háreket etip atırman. Bunda maǵan anam hám Uljanay sińlim járdem berip kelmekte. Aldaǵı waqıtta tigiw cexın ashıp, hayal-qızlardıń bántligin támiyinlep, quraq quraw ónerin ele de rawajlandırsam degen niettemen, – deydi Húrliman.
Biz bazıda jumıssızlıqtı báne etip, tiyisli orınlardan járdem sorap júrgen puqaralardıń gúwası bolamız. Al, Húrliman bolsa óz óneri, óziniń miyneti arqalı tapqan dáramatı menen ayaqqa turıp, jańa tigiw cexın ashıwdı óz aldına maqset etip qoymaqta. Ómir jolındaǵı jaqsı nietleri de ózi quraǵan shıraylı quraqları kibi quralıp, aǵla maqsetler menen keleshekke jetleley beriwine tileklespiz.
Gúlnara Turdıshova, Qaraqalpaqstan xabar agentligi