"Keksalar uchun turizm oyligi"
2025-11-05 10:00:00 / Министрлик
"Kekseler ushın turizm aylıǵı"
️Ózbekstan Respublikası Ministrler Kabinetiniń 2020-jıl 20-maydaǵı "Kekselerdi mámleket tárepinen qollap-quwatlaw sistemasın ele de jetilistiriwdiń qosımsha is-ilajları haqqında"ǵı 340-sanlı qararı menen hár jılı noyabr ayı "Kekseler ushın turizm aylıǵı" dep járiyalanǵanına baylanıslı Qaraqalpaqstan Respublikası "Nuraniy" qorı qáwenderliginde, "Aqshakól travers" turistlik firması menen birgelikte 4-noyabr kúni Tórtkúl rayonınan 50 nuranıylardıń Xiywa qalasına sayaxatı shólkemlestirildi.
Sayaxat dawamında nuranıylar tariyxıy hám eski qala - Xiywanıń "Iyshan qala," "Kelteminar," "Góne ark sarayı," "Xan rezidenciyası," "Muhammed Feruzxan medresesi" sıyaqlı tariyxıy esteliklerine, "Pahlavon Mahmud" mavzoleyi, "Úsh áwlie," "Qaytarmısh ata" zıyarat orınlarına sayaxat etti. "Sherǵazıxan medresesi"nde shólkemlestirilgen "Húkimdar hám shayır" muzeyinde Maqtumqulı, Ájiniyaz, Beket ata oqıǵan dáwirleri hám dóretiwshiliginen úlgilerdi kórip,tamashaladı.
Nuraniylar ushın túslik "Iyshan qala" asxanasında shólkemlestirildi. Túslikten keyin tariyxıy hám zamanagóylik úylesip, Xiywa qalasınıń jáne bir turistlik ornına aylanǵan, 25 gektar maydanda jaylasqan, "Kók kól" kóliniń boyında jaylasqan miymanxana, restoran, shıǵıs bazarı, akvapark, muzıkalı fontan, 3 mıń adamǵa mólsherlengen amfiteatr, "Kóhna Úrgensh" muzeyi hám bir neshe kinoteatr, koncert zalları, zergerlik, ónermenchilik sawda dúkanlarınan ibarat "Arda Xiywa" (Máńgi Xiywa) mádeniy dem alıw kompleksin barıp kórdi hám qızıqlı dem aldı. Nuraniylar sayaxat ushın mámleketimiz basshısı, Respublikalıq "Nuraniy" qorına óz minnetdarshılıǵın bildirip, elimiz tınıshlıǵı, mámleketimiz gúllep-jasnawın tilep pátiyaǵa qol kóterdi.