Qaraqalpaqstan Respublikası Tórtkúl rayonı hákimligi

MEDICINA HÁM FARMACEVTIKA XÍZMETKERLERI KÚNI MÚNÁSIBETI MENEN BAYRAM ILAJÍ ÓTKERILDI

Tórtkúlde medicina hám farmacevtika xızmetkerleri bayramı joqarı dárejede belgilendi
Insan salamatlıǵın saqlaw, nawqaslardıń dártine dárman bolıwday maqtanıshlı hám juwapkershilikli kásip iyeleriniń bayramı Tórtkúl rayonında úlken saltanat penen belgilendi.
Bul ilajda rayondaǵı medicina mákemelerinde pidayı miynet etip atırǵan shıpakerler, jankúyer miyirbiykeler, farmacevtika tarawınıń wákilleri hám húrmetli veteranlar qatnastı.
Ilajdı Tórtkúl rayonı hákimi I.Xudaybergenov ashıp berip, taraw xızmetkerlerin qutlı áyyyam menen qızǵın qutlıqladı. Rayon hákimi óziniń shıǵıp sóylegen sózinde Prezidentimizdiń basshılıǵında elimizde densawlıqtı saqlaw sistemasın túp-tiykarınan jetilistiriw, xalıqqa kórsetilip atırǵan medicinalıq xızmettiń sapasın jańa basqıshqa kóteriw, medicinalıq mákemelerdiń materiallıq-texnikalıq bazasın bekkemlew hám zamanagóy texnologiyalardı ámeliyatqa keńnen engiziw baǵdarında ámelge asırılıp atırǵan úlken reformalarǵa ayrıqsha toqtap ótti.

Sonıń menen birge, keyingi jılları Tórtkúl rayonında da bul baǵdarda salmaqlı jumıslar orınlanıp, sezilerli nátiyjelerge erisilip atırǵanı atap ótildi.

Haqıyqatında da, aq xalat iyeleriniń mashaqatlı miyneti bárqulla joqarı bilim, júrekten shıǵatuǵın mehir, sabır-taqat hám sheksiz pidayılıqtı talap etedi.

Bayram keshesi jáne de payızlı hám quwanıshlı minutlarǵa ulastı: óziniń kóp jıllıq nátiyjeli miyneti, kásibine sadıqlıǵı hám tarawdıń rawajlanıwına qosqan múnásip úlesi menen hámmege órnek bolıp kiyatırǵan bir topar aldınǵı medicina hám farmacevtika xızmetkerlerine rayon hákimliginiń minnetdarshılıq xatları hám estelik sawǵaları saltanatlı túrde tapsırıldı.

Ilaj dawamında mádeniyat hám kórkem óner sheberleri tárepinen atqarılǵan nama-qosıqlar jıynalǵanlarǵa bayram keypiyatın baǵıshlap, keshege ózgeshe kóterińki ruwx baǵıshladı. Taraw pidayıları ushın jazılǵan bayram dasturxanı bolsa elimizde insan qádirine berilip atırǵan joqarı itibar hám húrmettiń jáne bir ayqın kórinisi boldı.