Qáwipsiz ortalıq hám balalar huqıqların qorǵawǵa baǵıshlanǵan profilaktikalıq ilaj ótkerildi
2026-10-29 15:00:00 / Министрлик
Qáwipsiz ortalıq hám balalar huqıqların qorǵawǵa baǵıshlanǵan profilaktikalıq ilaj ótkerildi
Búgin Tórtkúl rayonı "Shadlıq" mákan puqaralar jıyınında jaylasqan 73-sanlı ulıwma bilim beriw mektebinde oqıwshı-jaslar arasında salamat ortalıqtı qáliplestiriw hám huqıqbuzarlıqlardıń aldın alıwǵa qaratılǵan úgit-násiyatlaw hám profilaktika ilajı bolıp ótti.
Bul ilaj Ózbekstan Respublikası Prezidentiniń 2025-jıl 3-yanvardaǵı PQ-1-sanlı "2025-jılı Respublika máhállelerinde qáwipsiz ortalıqtı jaratıw hám huqıqbuzarlıqlardıń erte aldın alıw sistemasınıń nátiyjeliligin bunnan bılay da arttırıw boyınsha"ǵı qararı hám 2025-jıl 24-dekabrdegi PP-256-sanlı pármanı menen tastıyıqlanǵan "2026-2030-jıllarǵa mólsherlengen balalardı zorlıqtıń barlıq túrlerinen qorǵaw strategiyası"nıń 1-qosımshasınıń 9-bántiniń orınlanıwın támiyinlew maqsetinde shólkemlestirildi.Ilajda Sanitariyalıq-epidemiologiyalıq tınıshlıq hám jámiyet salamatlıǵı (S hám SRI) aymaqlıq bóliminiń shıpakeri R. Jumabaev, Tórtkúl rayonlıq medicina birlespesiniń narkolog-shıpakeri E. Sherimbetov, rayonlıq IIB Hayal-qızlar máseleleri boyınsha aǵa inspektorı N. Xudaybergenova hám "Shadlıq" máhállesi jetiligi wákilleri qatnastı.
Ushırasıw dawamında taraw qánigeleri tárepinen oqıwshılarǵa hám pedagogikalıq jámáátke balalarǵa bolǵan zorlıqtıń hár qanday túrine qarsı gúresiw, jas óspirimler arasında unamsız ádetlerdiń tarqalıwına jol qoymaw hám salamat turmıs tárizin qáliplestiriw boyınsha hár tárepleme túsinikler berildi.
Sonday-aq, qatnasıwshılarǵa huqıqıy hám medicinalıq sawatlılıqtı arttırıwǵa xızmet etetuǵın arnawlı esletpeler hám bukletler tarqatıldı.