Qaraqalpaqstan Respublikası Tórtkúl rayonı hákimligi

XALIQTIŃ MÚRÁJATLARI MENEN ISLESIW - TIYKARǴI WAZIYPA
 

Búgin Tórtkúl rayonı hákimliginde xalıq múrájatları menen nızamlı tártipte islesiw hám olardıń mashqalaların sistemalı sheshiw máselelerine baǵıshlanǵan májilis bolıp ótti.
Májiliste Ózbekstan Respublikası Prezidentiniń Qaraqalpaqstan Respublikasındaǵı Xalıq qabıllawxanası baslıǵınıń orınbasarı Allabergenova Nilufar Reimbaevna qatnastı.
Ilaj dawamında rayon hákiminiń orınbasarları hám tarawlıq shólkemlerdiń basshıları menen júzbe-júz sóylesiw ótkerilip, hár bir taraw juwapkerleriniń búgingi kúndegi jumıs nátiyjeliligi hám xalıq tárepinen kóterilip atırǵan áhmietli mashqalalar hár tárepleme tallandı. Májiliste tiykarǵı itibar hár bir kelip túsip atırǵan múrájattı júzeki emes, al nızam sheńberinde hám sapalı úyrenip, xalıqtı qıynap atırǵan mashqalalardı ornında saplastırıw arqalı Xalıq qabıllawxanaları hám mámleketlik uyımlarǵa bolǵan isenimdi jáne de bekkemlewge qaratıldı.
Sonday-aq, múrájatlar eń kóp kelip túsip atırǵan tarawlar boyınsha mashqalalardıń kelip shıǵıw sebeplerin saplastırıw boyınsha sistemalı jumıslar alıp barılatuǵını atap ótildi.
Májiliste Qaraqalpaqstan Respublikası Ministrler Keńesiniń múrájatlar bólimi baslıǵı Abdulla Ayımbetov ta qatnasıp, xalıqtıń múrájatların unamlı sheshiwde ámelge asırılıwı tiyis bolǵan tiykarǵı wazıypalar hám sistemanı bunnan bılay da jetilistiriw boyınsha óz pikir-usınısları menen ortaqlastı.