"Kásip hám miynet kúni" múnásibeti menen Shoraxan APJ aymaǵında jaylasqan 3-sanlı texnikumda keń kólemli ruwxıy-aǵartıwshılıq bayram ilajı joqarı dárejede shólkemlestirildi
2026-05-14 14:00:00 / Министрлик
"Kásip hám miynet kúni" múnásibeti menen Shoraxan APJ aymaǵında jaylasqan 3-sanlı texnikumda keń kólemli ruwxıy-aǵartıwshılıq bayram ilajı joqarı dárejede shólkemlestirildi
Ilajda Tórtkúl rayonı hákimi I.Xudaybergenov, rayonlıq IIB baslıǵı podpolkovnik M.Muratov, rayon prokurorı S.Yakubov hám taraw basshıları qatnasıp, texnikum oqıwshıları hám atalıqqa alınǵan jaslar menen qızǵın pikirlesti.
Shıǵıp sóylegenler tárepinen elimizde jaslarǵa qaratılıp atırǵan itibar, olar ushın jaratılıp atırǵan imkaniyatlar, kásip-óner ielew, miynet súygishlik hám zamanagóy bilimlerdi ózlestiriw búgingi kúnniń áhmietli talabı ekenligi ayrıqsha atap ótildi. Sonday-aq, Ózbekstan Respublikası Prezidentiniń fevral ayında ótkerilgen videoselektor májilisinde jaslardı qollap-quwatlaw, olardıń bántligin támiyinlew, kásip-ónerge baǵdarlaw hám huqıqbuzarlıqlardıń aldın alıw boyınsha berilgen tapsırmalardıń mazmun-mánisi haqqında da pikirler bildirildi.
Ilaj dawamında texnikum oqıwshıları tárepinen hár qıylı kásip baǵdarları boyınsha tayarlanǵan kórgizbeler tanıstırıldı. Kórgizbelerde qatnasıwshılarǵa zamanagóy texnika quralları, ámeliy úskeneler, oqıw procesinde paydalanılıp atırǵan qurılmalar hám jaslardıń ámeliy jumısları tanıstırıldı.
Jaslar ózleriniń kásiplik kónlikpeleri, dóretiwshilik qatnası hám texnikalıq potencialın kórsetip, ilaj qatnasıwshılarında úlken qızıǵıwshılıq oyattı.
Sonday-aq, ilaj juwmaǵında shashka hám stol tennisi jarıslarında sıylı orınlardı ielegen qatnasıwshılar diplom hám estelik sawǵaları menen sıylıqlandı. Bayram ilajı barlıq qatnasıwshılarda jıllı tásir qaldırdı.