Tórtkúl rayonında dene tárbiyası páni muǵallimleri ushın attestaciyanıń ámeliy imtixan processleri baslandı
2026-05-12 10:30:00 / Министрлик
Qaraqalpaqstan Respublikası Tórtkúl rayonında dene tárbiyası páni muǵallimleri ushın attestaciyanıń ámeliy imtixan processleri baslandı. Bul processtiń ashılıw máresimi kóterińki ruwxta shólkemlestirildi.
Ilajda Qaraqalpaqstan Respublikası Sport ministriniń orınbasarı A.Qalbaev hám Tórtkúl rayonı sport mektebiniń direktorı E.Ibragimov qatnasıp, attestaciya procesiniń bilimlendiriwdiń sapasın arttırıw, dene tárbiya hám sport tarawında jumıs alıp barıp atırǵan pedagoglardıń kásiplik sheberligin bunnan bılay da rawajlandırıwdaǵı áhmietin ayrıqsha atap ótti.
Sonday-aq, imtixanlardıń ashıq-aydın túrde, belgilengen tártip hám reje talapları tiykarında ótkeriliwi boyınsha tiyisli usınıslar berildi.
Bul attestaciya ámeliy imtixanları dawamında dene tárbiyası páni muǵallimleriniń kásiplik bilim hám kónlikpeleri, ámeliy tayarlıǵı hám pedagogikalıq sheberligi bahalanadı.