Rásmiy múnásibet
2026-03-11 19:00:00 / Министрлик
Rásmiy qatnasıq
Sociallıq tarmaqlarda puqara A.R. tárepinen bildirilgen sın pikirler boyınsha tómendegiler málim etiledi:
Puqaranıń 2026-jıl 4-fevraldaǵı múrájatı tiykarında 7-fevral kúni hákim járdemshisi tárepinen usınısnama berilgen hám bank penen kredit shártnamasına qol qoyılǵan. Biraq, 2026-jıl 16-fevral kúni bank xızmetkerleri tárepinen ornına shıǵıp úyrenilgende, shártnamada kórsetilgen sharwa malları (gunajinler) shańaraqta joq ekenligi anıqlanǵan. Ónim ámelde jetkerip berilmegeni sebepli, aldawshılıq hám qarjılardı maqseciz jumsawdıń aldın alıw maqsetinde kredit ajıratıw biykar etilgen.
Usı jıldıń 4-mart kúni puqara "Hár bir shańaraq - isbilermen" baǵdarlaması sheńberinde qayta arza bergen. Usı processte júzege kelgen túsinbewshilikler boyınsha tómendegi huqıqıy tiykarlar bar:
PQ-49-sanlı hám PQ-55-sanlı qararlardıń talabı: Ónim marketpleys arqalı satıp alınǵanda, kredit qarjısı ónim jetkerip berilgeni bank hám hákim járdemshisi tárepinen monitoring akti arqalı tastıyıqlanǵannan soń ótkerip beriledi.
Kredit ajıratıw procesi tolıq sanlastırılǵan bolıp, hár bir basqısh puqaranıń Elektron sanlı imzası (ERI) arqalı tastıyıqlanadı. Bul bolsa qarjılardı úshinshi shaxslar tárepinen ózlestiriw imkaniyatın pútkilley biykarlaydı.
Ministrler Kabinetiniń 373-sanlı qararına tiykarlanıp kredit ajıratıw tómendegi shınjır tiykarında ámelge asırıladı:
Arza beriw (Puqara tárepinen).
Úyreniw hám usınısnama (Hákim járdemshisi tárepinen).
Kredit shártnaması (Bank tárepinen).
Aldı-sattı shártnaması (Jetkerip beriwshi hám puqara ortasında).
Esap-faktura hám akt (Ónim jetkerip berilgennen keyin).
Qarjı ótkeriliwi (3 bank jumis kúninde).
Puqara A.R. menen túsindiriw jumısları alıp barılıp, shártnamanı biykarlaw hám qayta rásmiylestiriw tártipleri úyretilgen hám júzege kelgen mashqala saplastırılǵan.
Puqaralardan sociallıq tarmaqlarda maǵlıwmat tarqatıwda qalıslıqqa ámel etiw, tiykarsız maǵlıwmatlar tarqatpaw jáne júzege kelgen máseleler boyınsha wákillikli uyımlarǵa múrájat etiwlerin soraymız.
ATB "Mikrokreditbank" Tórtkúl bank xızmetleri orayı