Qaraqalpaqstan Respublikası Tórtkúl rayonı hákimligi

ǴALLAŃIZǴA QOSIMSHA TÓGIN BERIŃ HÁM AGROTEXNIKALIQ ILAJLARDI ÓZ WAQTINDA QOLLANIP, ǴALLADAN MÓL ÓNIM ALIWǴA ERISIŃ!

Tórtkúl rayonı fermerler keńesi Prezidiumı aǵzalarınıń fermerlerge múrájatı

Qádirli watanlaslar!
Húrmetli diyqan hám fermerler!
Awıl xojalıǵında global klimat ózgeriwi hám suw tamtarıslıǵı sharayatında ónim jetistiriwdi kóbeytiw arqalı xalqımızdıń sapalı azıq-awqatqa talabın támiyinlew tiykarǵı wazıypamız bolıp esaplanadı.

Mámleketimiz basshısı 2025-jıl 26-dekabrdegi múrájatında awıl xojalıǵında ónimdarlıqtı jańa texnologiyalar tiykarında arttırıw hám tarawdı qollap-quwatlaw boyınsha áhmietli wazıypalardı belgilep berdi.

Awıl xojalıǵı xızmetkerleri kúni múnásibeti menen agrar tarawda miynet etip atırǵan diyqan hám fermerlerdiń ekonomikamızdı kóteriw, xalqımızdıń abadanlıǵın arttırıw, azıq-awqat qáwipsizligin támiyinlew baǵdarındaǵı úlken xızmetlerin atap ótti. Bul, álbette, fermer, diyqanlarımızdı joqarı sheklerge hám joqarı nátiyjelerge ruwxlandıradı, óz wazıypasına úlken emes.
Bul, álbette, fermer, diyqanlarımızdı joqarı sheklerge hám joqarı nátiyjelerge ruwxlandıradı, óz wazıypasına úlken juwapkershilik penen qarawǵa iytermeleydi.
Mámleketimiz basshısı tárepinen qabıl etilgen kóplegen Párman hám qararlar Siz, diyqan hám fermerlerdiń awıl xojalıǵı ónimlerin jetistiriwdegi úlken tabıslarıńızǵa bekkem tiykar jaratpaqta.
Atap aytqanda, Ózbekstan Respublikası Prezidentiniń 2025-jıl 9-dekabrdegi "Paxta hám ǵálleshilikte ónimdarlıqtı arttırıw ushın joqarı nátiyjeli intensiv agrotexnologiyalardı qollanıwdıń qosımsha ilajları haqqında"ǵı PQ-370-sanlı qararı menen fermerlerge úlken jeńillikler hám wákillikler berildi. Sonıń ishinde, zamanagóy intensiv agrotexnologiyalardı keńnen engiziw, ilim jetiskenlikleri hám ustaz-shákirt dástúrlerine tiykarlanǵan jańa sistemanı engiziw arqalı ónimdarlıqtı arttırıw, ǵálleshilikte ónimdarlıqtı 100 centnerge shekem jetkeriw baǵdarında mámleket tárepinen qollap-quwatlaw ilajları belgilendi.
Ǵálle jetistiriwshi fermer xojalıqların finanslıq qollap-quwatlaw maqsetinde 2026-jıl óniminen baslap ǵálleni óz qarjıları yamasa kommerciyalıq kreditler esabınan jetistirip, onı belgilengen tártipte birja sawdaları yamasa mámleketlik resurs ushın realizaciyalaǵan awıl xojalıǵı kárxanalarına ónim bahasınıń 10 procenti muǵdarında subsidiya beriledi.
Bul jeńilletilgen kreditti almastan ǵálle jetistiriwshi fermer xojalıqları ushın úlken imkaniyat, degeni.
Sonday-aq, suwdı únemleytuǵın texnologiyalardı engiziw baǵdarında úlken jeńillikler berilgeni de fermerlerimizdi suwdan únemli paydalanıwǵa hám ǵálleden joqarı zúráát alıwǵa xoshametleydi.
Jańa Ózbekstanımızdıń bıyılǵı úlken ǵálle qırmanın sheber diyqanlar, fermerler, suwshılar, agronom hám mexanizatorlar jáne tarawdıń pidayı ilimpazları, tájiriybeli qánigelerdiń mashaqatlı miynetleriniń esabınan jaratılatuǵının hámmemiz sezip turmız.
Mámleketimizde fermer xojalıqlarına ǵálle jetistiriw ushın ajıratılǵan jeńilletilgen kredit qarjılarınan erkin paydalanıw jáne xızmet kórsetiwshi hám resurs jetkerip beriwshilerdi ıqtıyarlı tańlaw huqıqınıń berilgeni, sonday-aq, dándi satıp alıw hám satıwda birja mexanizminiń engizilgeni Siz fermerlerge úlken mápdarlıqtı támiyinlemekte.
Diyqanlardıń sózi menen aytqanda, "Jıl jılǵa uqsamaydı," búgingi kúnde ǵálle maydanların tárbiyalawda ózgeshe agrotexnikalıq ilajlardı ámelge asırıwdı dáwir tezligi talap etpekte.
Áziz miynetkesh diyqan hám fermerler!
Joqarıdaǵı kemshiliklerdi óz waqtında saplastırıw ushın Ózbekstan fermerleri keńesi prezidiumınıń aǵzaları, tiyisli taraw ilimpazları hám qánigeleri tárepinen ǵálle jetistiriwshi fermer xojalıqları hám klasterlerge 2026-jılı hár bir gektar ǵálleden 100 centnerge shekem ónim alıw ushın tómendegi jumıslardı ámelge asırıwdı maqsetke muwapıq, dep esaplaymız:
birinshiden, hár bir fermer xojalıǵı tárepinen ǵálle maydanların jáne bir márte kórip shıǵıp, rawajlanıwınan artta qalıp atırǵan maydanlardı anıqlap alıń;
ekinshiden, qısqa múddette barlıq maydanlarǵa jeterli azotlı tóginler rezervin jaratıw hám keshki jáne artta qalıwshı ǵálle maydanların jaqsılaw maqsetinde gektarına qosımsha 100-150 kg azotlı tóginler menen azıqlandırıwdı shólkemlestirip, ǵálleden bereketli zúráát alıwǵa erisiw;
Úshinshiden, suwǵarılmaǵan ǵálle maydanlarında oq japlar aralıǵın 60-70 metrden alıw hám qısqa múddette jeńil suwǵarıwdı shólkemlestiriw;
tórtinshiden, egilgen ǵálle maydanlarında kúndizgi hám keshki waqıtlarda da atızlarda sharwa malların baǵıw jaǵdayları kóbeymekte, sonıń ushın shóplerdi shóp basıwdan qorǵaw maqsetinde atız shetlerin sheten menen orawdı shólkemlestiriń;
besinshiden, yanvar ayında máwsim dawamında talap etiletuǵın mineral tóginler, biostimulyatorlar hám ximiyalıq qurallar rezervin qáliplestiriw, texnikalardı ońlaw jumısların ámelge asırıp, hawa-rayı sharayatınan kelip shıǵıp, suspenziya sebiwdi shólkemlestiriw;
altınshıdan, ǵálle maydanında jawınlatıp suwǵarıwdı jolǵa qoyıp, mámleket tárepinen beriletuǵın subsidiya qarjısın alıń hám ónimdarlıqtı hár gektarınan 10-12 centnerge arttırıń hám suwdı 35-45 procentke únemleń;
jetinshiden, atızıńızdıń suw kiriw qulaǵına qándek qazıp, gektarına 3 tonnadan jergilikli tógin toplawdı shólkemlestiriń;
segizinshiden, keshki hám ónip shıqpaǵan ǵálle maydanlarına qurǵaq, shirigen jergilikli tógin sebiwdi shólkemlestiriń, bunda, gektarına 5 tonnadan jergilikli tógin qollanılǵanda gúzgi biyday ónimdarlıǵı 6-10 centnerge artıwı hám jergilikli, mineral tóginler menen birge qollanılǵanda nátiyjelilik jáne de joqarı bolıwın hesh qashan umıtpań;
toǵızınshıdan, 10 kún múddette ǵawasha qatar aralarına egilgen maydanlardı ǵawasha paqalınan kesiwshi agregatlar járdeminde tazalaw, bunda ǵawasha paqalın qolda suwırıp alıwǵa jol qoymaw;
onınshıdan, xalıqtıń úylerindegi hám sharwashılıq komplekslerindegi jergilikli tóginlerdi toplap, atızlarǵa shıǵarıwdı shólkemlestiriw;

on birinshiden, hawa rayınıń qolaylı kúnlerinen paydalanıp, atız átirapların, ishki hám xojalıq salmaların tazalaw hám parallel túrde betonlastırıw jumısların juwmaqlaw;
on ekinshi, hár bir fermer xojalıǵınıń baslıǵı ǵálleshilik klaster kárxanaları menen birgelikte jumıslardı jáne de jedellestirip, ǵállege qosımsha azıqlıq berip, joqarıdaǵı ilajlardı ámelge asırıp, usı jılı ǵálle zúráátin gektarına 100 centnerge shekem jetkerip, joqarı dáramat alıwǵa erisiń.
Áziz fermer hám diyqanlar!
Xalqımız búgin biz diyqan hám fermerlerdiń kúsh-ǵayratı, mártligine kóz tikip tur. Bunı bir zamat bolsa da, yadtan shıǵarmayıq. Dasturxanımız molshılıq penen, bazarlarımız ónimlerge tolı hám arzan, turmısımızdıń jáne de abadan bolıwı házirgi waqıtta ámelge asırılatuǵın agrotexnikalıq ilajlarǵa baylanıslı ekenin umıtpań.
Óz dáramatıńızdı arttırıw hám mámleketimizdiń abadanlıǵına múnásip úles qosıw ushın bársheńizdi shın kewilden islewge, pidayılıq úlgisin kórsetiwge shaqıramız!

Tórtkúl rayonı fermerler keńesi Prezidium aǵzaları