Taxtakópir rayonında Muǵallimler hám ustazlar kúni múnásibeti menen saltanatlı bayram ilajı bolıp ótti
2026-10-01 19:35:00 / Jańalıqlar
Taxtakópir rayonında Muǵallimler hám ustazlar kúni múnásibeti menen saltanatlı bayram ilajı bolıp ótti
Búgin, 1-oktyabr - Muǵallimler hám ustazlar kúni múnásibeti menen Taxtakópir rayonında bilimlendiriw tarawınıń wákilleri, veteran ustazlar hám keń jámiyetshilik wákilleri qatnasıwında saltanatlı bayram ilajı shólkemlestirildi.
Ilajda Taxtakópir rayonı hákimi J.Adilov qatnasıp, tálim-tárbiya tarawında nátiyjeli miynet etip atırǵan ustazlardı kásiplik bayramı menen qızǵın qutlıqladı. Óz qutlıqlawında pedagoglardıń jas áwladtı hár tárepleme bárkamal etip tárbiyalaw, olarǵa zamanagóy bilim hám kónlikpeler beriw, elimizdiń rawajlanıwı jáne jámiyetimizdiń rawajlanıwına múnásip úles qosıwdaǵı ornı hám áhmiyetin ayrıqsha atap ótti.
Saltanatlı ilaj dawamında bilimlendiriwdiń sapasın arttırıw, jaslar tárbiyası, ruwxıy-aǵartıwshılıq jumıslar hám oqıwshılardı hár qıylı jetiskenliklerge baǵdarlaw baǵdarında ayrıqsha belsendilik kórsetip kiyatırǵan bir topar pedagoglarǵa rayon hákimliginiń húrmet jarlıqları hám estelik sawǵaları saltanatlı túrde tapsırıldı.
Sonday-aq, usı jılı ótkerilgen "Jıl muǵallimi - 2026" tańlawında Taxtakópir rayonındaǵı 3-sanlı ayırım pánler tereńlestirilip oqıtılatuǵın klassları bar ulıwma orta bilim beriw mektebiniń ózbek tili páni muǵallimi Qıpshaqbaeva Aynura Paraxatovna jeńimpaz dep tabıldı.
Saltanatlı ilajda rayon hákimi J.Adilov Aynura Paraxatovnanı usı joqarı nátiyje menen qutlıqlap, tańlaw jeńimpazına bazalıq esaplaw muǵdarınıń 1 400 esesi, yaǵnıy 616 million sum muǵdarındaǵı vaucherdi saltanatlı túrde tapsırdı. Bul ustazdıń kóp jıllıq miyneti, kásiplik sheberligi hám tálim-tárbiya tarawına qosıp atırǵan úlesiniń múnásip bahası boldı.
Bayram ilajı dawamında ustazlarǵa húrmet hám minnetdarshılıq sezimlerin jámlegen qosıqlar hám kórkem shıǵıwlardan ibarat koncert baǵdarlaması qoyıp berildi.