Qaraqalpaqstan Respublikası Taxtakópir rayonı hákimligi

KEShKI KARTOShKA, AVGUST-SENTYABR PIYAZ HÁM ChESNOK HÁMDE TOQSANBASTÍ USÍLÍNDA AWÍL XOJALÍǴÍ EGINLERIN EGIP, SALMAQLÍ DÁRAMATQA IYE BOLÍŃ HÁM XALQÍMÍZ DASTURXANÍN MOL ETIWGE MÚNÁSIP ÚLES QOSÍŃ! Ózbekstan Respublikası Awıl xojalıǵı ministrligi hámde Ózbekstan fermerleri keńesiniń qıytaq jer iyeleri, diyqan hám fermer xojalıqlarına MÚRÁJATÍ Húrmetli qıytaq jer iyeleri, diyqan hám fermerler! Búgingi kúnde azıq-awqat qáwipsizligin támiyinlew - xalıqtıń abadanlıǵın arttırıwdıń eń tiykarǵı baǵdarlarınan birine aylanbaqta. Bir jılda eki-úsh márte zúráát alıw imkaniyatın beretuǵın biytákirar klimatımız hám ónimdar topıraǵımızdıń qádirine jetiń: hár bir qarıs jerden únemli paydalanǵan halda kartoshka, chesnok hám toqsanbastı usılında ovosh eginlerin egip, dasturxanımızdı jáne de mol etiwge múnásip úlesińizdi qosıń. Qıytaq jerleri, baǵ qatar araları hám atız shetlerine eginler egiń hámde mámleketimiz basshısınıń Párman hám qararları menen belgilengen Kámbaǵallıqtı qısqartıw hám bántlik ministrligi janındaǵı Diyqan xojalıqları hám qıytaq jer iyelerin qollap-quwatlaw qorınıń tómendegi jeńilliklerinen paydalanıń: jerden nátiyjeli paydalanıp, bir sotıxtan 5 million sumnan joqarı rásmiy dáramat tabıń hám jer salıǵınıń 90 procentin "keshbek" tárizinde qaytarıp alıń; qıytaq jerińizdegi eń úlgili hám innovaciyalıq joybar ushın bazalıq esaplaw muǵdarınıń 100 esesinen aspaǵan muǵdarda grantlar utıw imkaniyatınan paydalanıń; usta diyqanlar tárepinen qısqa múddetli oqıw kursların shólkemlestiriń hám hár bir kurs ushın bazalıq esaplaw muǵdarınıń 15 esesine shekemgi muǵdarda subsidiya alıń; máhálleńizde 50 procent shańaraqlardıń qıytaq jerinde eksportqa jaramlı ónim jetistiriwdi jolǵa qoyıwǵa járdemlesip, 100 million sumǵa shekem subsidiya alıń; qıytaq jer iyeleri hám diyqan xojalıqları awıl xojalıǵı ónimlerin jetistiriw, keptiriw, saqlaw hám qadaqlaw joybarları ushın; 7 jılǵa shekemgi múddetke 18 procent stavkada kreditler alıń; ıqsham muzlatqıshlı qoymaxanalar, qadaqlaw, keptiriw hám qayta islew úskeneleri, tayar haldaǵı ıssıxanalar ushın 5 jılda bólip tólew shárti menen lizingke alıń; xalıqtıń qıytaq jerlerinde nátiyjesiz eski baǵlardı rekonstrukciyalaw hám jańaların jaratıw ushın subsidiyalar alıń; suw támiynatı awır bolǵan aymaqlarda jer uchastkaların suwǵarıw ushın tik qudıqlardı burǵılaw, iske qosıw ushın subsidiya alıń; - suw resurslarınan únemli paydalanıp, qıytaq jer maydanlarında ónimdarlı hám joqarı dáramatlı awıl xojalıǵı ónimlerin jetistiriń; - keńes janındaǵı qıytaq jerdi rawajlandırıw tájiriybe maydanlarında qıytaq jerden nátiyjeli paydalanıw hám joqarı zúráát alıw boyınsha xalıqtıń bilim hám kónlikpelerin arttırıw; - Awıl xojalıǵı ministrligi janındaǵı ovosh jetistiriw ilimiy-izertlew institutı ilimpazları tárepinen islep shıǵılǵan qollanbadan paydalanıp joqarı zúráát alıwǵa erisiń. Qıytaq jer maydanları hámde diyqan xojalıqlarına ijaraǵa berilgen jerlerde egin tolıq egilmegen yaki qarawsız qaldırılǵan jaǵdaylarda: qıytaq jer iyeleri hám diyqan xojalıqlarına mámleketlik baǵdarlamalar sheńberindegi jeńilletilgen kreditler berilmeydi; - sociallıq qorǵawdıń birden-bir reestrine kirgizilgen puqaralar ushın názerde tutılǵan jeńillikler toqtatıladı; - "Onlayn máhálle" elektron platforması maǵlıwmatları tiykarında egin egilmegenligi anıqlanǵan jıl ushın jer salıǵı stavkası úsh ese muǵdarında esaplanadı. Húrmetli qıytaq jer iyeleri, diyqan hám fermerler! Keliń, juwapkershiligimizdi jáne de arttırıp, qıytaq jerlerge, baǵ qatar araları hám atız shetlerine kartoshka, piyaz, chesnok hám toqsanbastı eginlerin óz waqtında egiwdi shólkemlestireyik. Bunıń ushın tómendegi ilajlardı ámelge asırıw usınıs etiledi: Keshki kartoshka jetistiriwde: - keshki kartoshka ushın jerdi egin qaldıqlarınan tazalań, talap etilgen tereńlikte súrip, egiw ushın salma qatarların tayarlań; - jerdiń temperaturasın esapqa alıp egiwdi shólkemlestiriń; - suw resurslarınan únemli paydalanıp, 1-2 suw aralıǵında mineral tóginlerdi usınıs etilgen muǵdarda salıw joqarı zúráát jetistiriwde úlken áhmiyetke iye; - kartoshkanı ósiriwde rawajlanıw fazasın turaqlı qadaǵalawǵa alıń (paqaldiń ósiwi hám japıraqlar reńiniń ózgeriwine itibar beriw); - gúllew dáwirinen aldın zıyankeslerge (kolorado qońızı, sım qurtı hám basqalar) qarsı ximiyalıq islew beriwdi umıtpań; - kartoshka gúllegennen soń suwdi belgilengen normada beriwge itibar beriń; - gúz aylarında qısqa múddetli suwiq hawa payda bolǵanda, ústin plyonka (duga qılıp) yamasa agrovolokna menen jawıń. Avgust-sentyabr piyazı, chesnok jetistiriwde: jerdi egin qaldıqlarınan tazalań, kerekli tereńlikte súrip, jerdi egiwge tayarlań; - piyaz hám chesnoktı sentyabr ayında egiw jeterli nál alıw hám nállerdiń jaqsı tamır jayıwında úlken áhmiyetke iye; - suw resurslarınan únemli paydalanıń; - ósimliklerdi kútiwde rawajlanıw fazasın turaqlı qadaǵalawǵa alıń, jabayı shóplerden taza saqlań; - eginlerdi kesellik hám zıyankeslerden nátiyjeli qorǵań, mineral hám organikalıq tóginlerden belgilengen normada paydalanıp, joqarı ónim hám qosımsha dáramatqa erisiń. Toqsanbastı usılında ovoshlar jetistiriwde: Toqsanbastı usılı tek ǵana jaqsı dáramat dáregi emes, al xalıqtıń qıs hám báhár aylarındaǵı ovoshqa bolǵan talabın qanaatlandırıp, bazarlarımızda turaqlı baha hám molshılıqtı támiyinlewdiń de áhmiyetli faktori bolıp esaplanadı. - jerdi aldınǵı egin qaldıqlarınan tazalap, kerekli tereńlikte súrip, egiwge tayarlań; - gúzde suwıq hám ıǵallıq baslanıwınan aldın toqsanbastı usılında egiw ushın suwıqqa shıdamlı - geshir, kók piyaz, as láblebisi, kapusta hám hár túrli kók shópler (ismaloq, ukrop, petrushka, selderey, salat) tuqımların tayarlap keshiktirmey egiń; - tuqımlardı usınıs etilgen norma hám tereńlikte egip, dáslepki suwdı óz waqtında beriń; - eginlerdi kesellik hám zıyankeslerden qorǵań, jabayı shóplerden taza saqlap, joqarı zúráátke erisiń. Húrmetli qıytaq jer iyeleri, diyqan hám fermerler! Hámmeńizdi qıytaq jerlerden, baǵ qatar araları hám atız shetlerinen únemli paydalanıp, kartoshka, avgust-sentyabr piyazı, chesnok jáne toqsanbastı usılında awıl xojalıǵı eginlerin egiw jumısların belgilengen múddetlerde juwmaqlawǵa shaqıramız. Este saqlań, búgingi háreket - erteńgi molshılıq hám abadan turmısımızdıń bekkem tırnaǵı! Jerimiz bereketli, ırısqımız mol, shańaraqlarımız hámiyshe tınısh hám abat bolsın! Ekonomikamızdı kóteriw hám ana jurtımızdı jáne de abat etiw jolında múnásip úlesińizdi qosıń - awıl xojalıǵı eginlerin óz múddetinde egiń hám joqarı zúráátke erisiń! Ózbekstan Respublikası Awıl xojalıǵı ministrligi Ózbekstan fermerleri keńesi