Ulıwma orta bilim beriw mektepleriniń pitkeriwshilerine altın medalları tapsırıldı
2026-07-03 17:10:00 / Jańalıqlar
Ulıwma orta bilim beriw mektepleriniń pitkeriwshilerine altın medalları tapsırıldı
Búgin Taxtakópir rayonı Mektepke shekemgi hám mektep bilimlendiriw bólimine qaraslı ulıwma orta bilim beriw mektepleriniń qábiletli pitkeriwshilerine altın medalları saltanatlı túrde tapsırıw ilajı bolıp ótti.
Ilajǵa rayon hákimi J.Adilov, Mektepke shekemgi hám mektep bilimlendiriw bólimi baslıǵı B.Utepbergenov, mektep direktorları, pitkeriwshi jaslar hám olardıń ata-anaları qatnastı.
Onda rayon hákimi, mektep pitkeriwshilerin jetiskenlikleri menen shın kewilden qutlıqlap, ulıwma orta bilim beriw mekteplerin ayrıqsha bahalarǵa tamamlap, oqıwda, jámiyetlik jumıslarda belsene qatnasqan pitkeriwshilerge altın medalların saltanatlı túrde tapsırdı.
Maǵlıwmat ornında aytıw orınlı, bıyılǵı oqıw jılında ulıwma orta bilim beriw mekteplerin jámi 416 oqıwshı pitkerip atırǵan bolsa, sonnan 3 pitkeriwshi altın medalı menen mektepti tabıslı tamamlamaqta.
Atap aytqanda:
5-mektep oqıwshısı Jarılqasınova Aziya pán olimpiadasınıń Qaraqalpaqstan Respublikası basqıshında sıylı 2-orındı hám Ózbekstan Respublikası basqıshında sıylı 3-orındı jeńip alıwǵa eristi.
16-mektep oqıwshısı Esemuratova Rawshan óz qatarları arasınan ajıralıp turıp 4 pánnen sertifikat alıp múddetinen aldın Joqarı oqıw ornına yaǵnıy studentlikke qabıl etiliw aldında tur.
17-mekteptiń oqıwshısı Biymurzaeva Aray 3 pánnen sertifikat alıwǵa miyasar boldı. Joqarı oqıw ornına kiriw balınıń 60 procentin toplawǵa eristi.