Taxtakópir rayonı hákimi Adilov Jambul Agitaevichtiń rayon xalqı, áziz jaslarımız hám ata-analarǵa múrájatı
2026-06-23 17:15:00 / Jańalıqlar
Taxtakópir rayonı hákimi Adilov Jambul Agitaevichtiń rayon xalqı, áziz jaslarımız hám ata-analarǵa múrájatı
Narkotik hám psixotrop zatlar - keleshegimizge qáwip!
Húrmetli rayonımız xalqı, qádirli jaslar!
Búgingi kúnde pútkil dúnya qatarında elimizde de narkotik hám psixotrop zatlardıń nızamsız aylanısına qarsı keskin gúres alıp barılmaqta. Bul illet insan salamatlıǵı, shańaraqlardıń tınıshlıǵı hám jámiettiń rawajlanıwına úlken qáwip tuwdıratuǵın eń áhmiyetli mashqalalardan biri bolıp esaplanadı.
Ásirese, jaslarımızdı hár qıylı aldaw hám jalǵan wádeler menen óz duzaǵına tartıwǵa urınıp atırǵan náshebentlik hám psixotrop zatlardı tarqatıwshılarǵa barlıǵımız birgelikte qatań gúres alıp barıwımız zárúr.
Áziz jaslar!
Sizler mámleketimizdiń erteńgi kúni, xalqımızdıń eń úlken baylıǵısız. Salamat turmıs tárizine ámel etiń, bos waqtıńızdı sport, ilim hám kásip-óner iyelewge baǵıshlań. Hár qanday gúmanlı usınıslar, nızamsız zatlar yamasa olardı tarqatıwǵa baylanıslı jaǵdaylarǵa dus kelseńiz, dárhal huqıq qorǵaw uyımlarına xabarlasıń.
Húrmetli ata-analar!
Perzentlerimizdiń tárbiyası, olardıń kimler menen pikirlesip atırǵanı hám bos waqıtların qalay ótkerip atırǵanına biypárwa bolmayıq. Olardı zıyanlı illetlerden saqlaw bárshemizdiń muqaddes minnetimiz.
Húrmetli rayonımız xalqı!
Narkotikalıq hám psixotrop zatlar menen baylanıslı hár qanday nızamsız háreketlerge qarsı gúresiwde sergeklik hám puqaralıq juwapkershilikti jáne de arttırayıq. Salamat, ruwxıy bárkamal hám Watansúygish áwladtı tárbiyalaw jolında birgelikte háreket eteyik.
Umıtpań, náshebentlik - ómirge emes, apatshılıqqa alıp baratuǵın jol!
Adilov Jambul Agıtaevich
Taxtakópir rayonı hákimi