Xalıqaralıq "Baysın báhári" folklor festivalı joqarı dárejede ótkerilmekte.
2026-05-06 15:55:00 / Jańalıqlar
#XOSh_XABAR
Usı jıldıń 1-may kúninen baslap Surxandárya wálayatınıń Baysın rayonında milliy mádeniyatımız hám bay folklor miyrasımızdı keńnen úgit-násiyatlawǵa qaratılǵan Xalıqaralıq "Baysın báhári" folklor festivalı joqarı dárejede ótkerilmekte.
Usı festival sheńberinde shólkemlestirilgen xalıqaralıq tańlawda Taxtakópir rayonı Mádeniyat bóliminiń «Miyras» folklor-etnografiyalıq xalıq jámááti múnásip qatnasıp, óziniń joqarı sheberligi, saxna mádeniyatı hám milliy qádiriyatlarımızdı ayqın sáwlelendire alǵan shıǵıwları menen tóreshiler quramı hám tamashagóyler tárepinen tán alındı.
Atap aytqanda, jámáát tárepinen kórsetilgen «Tusaw kesiw toy» saxna kórinisi hám qaraqalpaq milliy oyınları tiykarında jaratılǵan kompoziciyalar óziniń biytákirarlıǵı, tariyxıy dástúrlerge sadıqlıǵı hám kórkem sóylew kúshi menen ajıralıp turdı. Nátiyjede komanda sıylı 2-orındı iyelep, 2 500 AQSh dolları muǵdarındaǵı aqshalay sıylıq penen sıylıqlandı.
Bul tabıs tek ǵana jámááttiń emes, al pútkil rayonımız mádeniyat tarawı wákilleriniń pidákerlik miyneti, milliy miyrasımızǵa bolǵan húrmet hám itibardıń ayqın kórinisi bolıp tabıladı.
Usı múnásibet penen, «Miyras» folklor-etnografiyalıq xalıq jámáátin usı joqarı nátiyje menen shın júrekten qutlıqlaymız! Keleshektegi dóretiwshilik jumıslarında úlken tabıslar, jáne de joqarı jetiskenlikler tileymiz.