Qaraqalpaqstan Respublikası Taxtakópir rayonı hákimligi

MÁMLEKETIMIZDIŃ AZÍQ-AWQAT QÁWIPSIZLIGIN TÁMIYINLEWGE ÓZ ÚLESIŃIZDI QOSIŃ, ÁSIRESE KARTOSHKA HÁM BASQA ZÁRÚR ÓNIMLERDI EGIWDI QISQA WAQITTA JUWMAQLAP, QOSIMSHA DÁRAMATQA IYE BOLIŃ!

Taxtakópir rayonı fermerler keńesi Prezidiumı aǵzalarınıń barlıq miynetkesh fermerlerge, baba diyqanlarǵa hám awıl xojalıǵı tarawına tiyisli kárxanalarǵa MÚRÁJATI

Húrmetli fermerler, diyqanlar hám awıl xojalıǵı tarawı pidayıları!

Siz, áziz diyqanlardıń dóretiwshilikke tiykarlanǵan miynetińiz ásirler dawamında xalqımızdıń abadan turmısı, mol dasturxanınıń tiykarǵı kepili sıpatında joqarı tán alınıp, qádirlep kelingen.

Búgingi kúnde azıq-awqat qáwipsizligin támiyinlew – tek ǵana awıl xojalıǵın turaqlı rawajlandırıw emes, al klimat ózgerisleriniń tásirin jumsartıw arqalı azıq-awqat qáwipsizligin támiyinlew, xalıq abadanlıǵın asırıwdıń eń áhmiyetli baǵdarına aylanbaqta.

Mámleketimiz basshısı Nawrız ulıwma xalıqlıq bayramı ilajında miyriman diyqan hám fermerlerimizge joqarı húrmet hám izzet kórsetip, olardıń xalqımız dasturxanın mol hám bereketli etiwdey ullı miynetin tán alıp, bul baǵdarda mámleket hám jámiyet tárepinen turaqlı qollap-quwatlaw dawam ettiriletuǵının atap ótti.

Usı qollap-quwatlawdan ruwxlanıp, azıq-awqat qáwipsizligin támiyinlew – hár birimizden juwapkershilik hám belsendilikti talap etetuǵın eń áhmiyetli wazıypalardan biri ekenligin sezingen halda, kartoshka, palız hám ovosh ónimlerin qısqa múddetlerde egiwdi shólkemlestirip, ishki talaptı tolıq qanaatlandırıw arqalı bazarlardaǵı bahalardıń turaqlılıǵın támiyinlewge óz úlesimizdi qosayıq.

«Hár bir qarıs jer – imkaniyat. Onnan aqılǵa uǵras paydalanıw bolsa tek ǵana jeke máp emes, al el-jurtımızdıń abadanlıǵına qosılǵan úles bolıp tabıladı» degen uran menen bir qarıs jerimizge de ónim egiwdi shólkemlestireyik.
Keliń, birgelikte háreket etip, xalqımız dasturxanın mol, el-jurtımızdı jáne de abadan eteyik!

Búgin fermerlerimizdiń tek ǵana awıl xojalıǵı emes, al ekonomikanı kóteriw, xalıq turmısın jaqsılaw, azıq-awqat qáwipsizligi baǵdarındaǵı isleriniń tán alınıwı usı muqaddes jerde tuwılıp-ósip, ózin mine usı eldiń perzenti dep bilgen Siz, áziz fermerlerdi óz mámleketi, xalqı aldındaǵı, sizi úmitler menen tárbiyalap, kamalǵa keltirgen jámiyet aldındaǵı minnetin orınlawǵa umtılıs oyatatuǵınına isenemiz.

Himmeti bálent diyqan hám fermerler!

Mámleketimiz xalqın awıl xojalıǵı ónimleri menen támiyinlew, xalqımız dasturxanına jetkeriw, bazarlarımızda bahalardıń ósip ketiwiniń aldın alıw eń tiykarǵı wazıypamız ekenin umıtpawımız kerek.

Azıq-awqat ónimlerin jetistiriw strategiyalıq áhmiyetke iye bolıwı menen bir qatarda, diyqan hám fermerlerimiz ushın jaqsı dáramat tabıw dáregi bolıp esaplanadı. Ásirese, kartoshka jetistiriw tek ǵana kúndelikli tutınıw ónimi emes, al xalıq tutınıwındaǵı eń áhmiyetli azıq-awqat ónimlerinen biridir.

Sol sebepli, azıq-awqat ónimlerin jetistiriw kólemin arttırıw arqalı bahalardıń turaqlılıǵın támiyinlew, importqa ǵárezlilikti azaytıw búgingi kúnniń eń aktual wazıypalarınan biri ekenin umıtpayıq.

Keliń, el-jurtımızdıń rawajlanıwı ushın birgelikte háreket eteyik! «Áhmiyetli bir aylıq»ta atız shetlerinen aqılǵa uǵras hám nátiyjeli paydalanıw arqalı awıl xojalıǵı ónimlerin, atap aytqanda, kartoshka hám de palız-ovosh eginlerin egiwdi juwmaqlap alayıq.

Bunnan tısqarı, baǵ hám qatar aralarınan ónimli paydalanıp, qosımsha túrde ovosh eginlerin egip, ónimdarlıqtı arttırıw hám ónim túrlerin kóbeytiwge, sol arqalı xalqımızdıń dasturxanın mol, el-jurtımızdı abadan etiwge óz úlesińizdi qosıń!

Miynetkesh hám pidayı fermerler!

Mámleketimizde azıq-awqat qáwipsizligin támiyinlew, atap aytqanda, palız-оvоsh, kartoshka hám basqa da eginlerden joqarı ónim alıw ushın mart-aprel aylarında, yaǵnıy «áhmiyetli bir aylıq»ta biz, fermerler, palız-оvоsh tuqımların óz waqtında jerge egip, agrotexnikalıq ilajlardı ámelge asırıwımız zárúrligin, sonday-aq, erte egip qosımsha dáramat alıw múmkinshiligin júrekten sezingen halda, tómendegi ilajlardı ámelge asırıwıńızdı soraymız:
birinshiden - hár bir fermer xojalıǵı tárepinen «áhmiyetli bir aylıq» dawamında eginlerdi jaylastırıw dizimine muwapıq ashıq maydanlarda kartoshka, palız-ovosh hám basqa da eginlerdi egiwdi tolıq juwmaqlasın;
ekinshiden - 10 kúnlik múddette atız shetlerine palız-ovosh, maylı, sobıqlı yaki mákke tuqımları menen nállerin egiwdi shólkemlestiriń;
úshinshiden - ilimiy-izertlew mákemeleri menen sheriklikti kúsheytip, sapalı hám sertifikatlanǵan tuqım egiń;
tórtinshiden - kommerciyalıq bankler arqalı kartoshka jetistiriw qárejetlerin qarjılandırıw ushın ónim bahasınıń 50 procentine shekem jıllıq 12 procent stavkada 6 aylıq jeńillikli dáwir menen 12 ay múddetke qamsızlandırıw polisi tiykarında ajıratılatuǵın kreditlerden paydalanıp, kartoshkanı óz waqtında egip, qosımsha dáramat alıń;
besinshiden - kartoshka, palız-ovosh hám basqa da eginlerdi jetistiriwde suwdı únemleytuǵın texnologiyalardı keńnen engizip, qararda belgilengen jeńilliklerden paydalanıń;
altınshıdan - kartoshka, palız-ovosh hám basqa da eginlerdi kesellik hám zıyankeslerden qorǵawdıń nátiyjeli ilajların kóriń, mineral hám organikalıq tóginlerden belgilengen norma tiykarında paydalanıp, joqarı ónim hám qosımsha dáramat alıwǵa erisiń.