Taxtakópirde "Olimpiya shıńları" jarıslarına tayarlıq kórilmekte
2026-03-06 16:30:00 / Jańalıqlar
Taxtakópirde "Olimpiya shıńları" jarıslarına tayarlıq kórilmekte
Búgin Taxtakópir rayonındaǵı 3-sanlı mekteptiń májilisler zalında sport tarawı juwapkerleriniń qatnasıwında áhmiyetli seminar ótkerildi. Ilaj 2026-jılǵı "Olimpiada shıńları" sport jarıslarınıń 1-basqısh oyınların joqarı dárejede shólkemlestiriwge baǵıshlandı.
Seminarǵa rayon hákiminiń orınbasarı Sh.Bekturǵanov, Qaraqalpaqstan Respublikası Sport ministriniń orınbasarı A.S.Qalbaev hám Sport mektebiniń direktorı B.Jarımbetov basshılıq etti.
Ilajdan gózlengen tiykarǵı maqset, sport mektebiniń trener-oqıtıwshıları hám mekteplerdiń dene tárbiyası muǵallimlerine jarıs nızamı hám ótkeriw tártibin túsindiriw, birinshi basqısh oyınların ashıq-aydın hám shólkemleskenlik penen shólkemlestiriw boyınsha kórsetpeler beriw, jas sportshılardı saylap alıw procesine juwapkershilik penen qatnas jasaw bolıp tabıladı.
Seminardan soń, Sport ministriniń orınbasarı A.S.Qalbaev rayondaǵı sport mektebi hám ulıwma bilim beriw mekteplerindegi sport obektleriniń jaǵdayın kózden ótkerdi. Úyreniw dawamında anıqlanǵan qáte-kemshilikler boyınsha sport mektebi direktorları hám xızmetkerlerine zárúr usınıslar berildi.