Taxtakópir rayonında isbilermen hayal-qızlardıń iskerligin rawajlandırıwǵa qaratılǵan ilajlar ótkerildi
2026-02-16 20:15:00 / Jańalıqlar
Taxtakópir rayonında isbilermen hayal-qızlardıń iskerligin rawajlandırıwǵa qaratılǵan ilajlar ótkerildi
Taxtakópir rayonında Shańaraq hám Hayal-qızlar bólimi hám Isbilermenler háreketi - Ózbekstan Liberal - demokratiyalıq partiyası Taxtakópir rayonlıq Keńesiniń baslaması menen máhállelerde isbilermenlikti rawajlandırıw, jas qızlar arasında isbilermenlik kónlikpelerin arttırıw hám olardıń sociallıq belsendi qatlamın keńeytiwge qaratılǵan bir qatar ámeliy ilajlar shólkemlestirildi.
Rayon kóleminde ótkerilgen "Máhálleniń isbilermen hayalı" tańlawında barlıq máhállelerden eń belsendi hám intaker isbilermen hayal-qızlar qatnastı. Tańlaw nátiyjesinde "Ózbekstan" MPJdan Jazira Daniyarova birinshi orın, "A.Adilov" APJdan Arzayım Allambergenova ekinshi orın, "Ǵárezsizlik" MPJdan Aynura Ziywatdinova bolsa úshinshi orındı iyeledi hám shólkemlestiriwshiler tárepinen estelik sawǵaları hám diplomlar menen sıylıqlandı.
Sonday-aq, "Bir qádemde - mıń imkaniyat" atamasında Taxtakópir mádeniyat sarayında isbilermen hayal-qızlar hám jas isbilermenler menen ushırasıw ótkerildi.
Ilajǵa rayon hákiminiń orınbasarı, Shańaraq hám Hayal-qızlar bóliminiń baslıǵı G.Seytnazarova, AT "Xalıq bank" juwapker xızmetkeri S.Qayırzaeva, “Qaraoy” APJ hákiminiń járdemshisi I.Ergasova hám psixolog Q.Qurbanbekovalar qatnastı.
Ushırasıw dawamında qatnasıwshılarǵa isbilermenlik hám ekonomikalıq jumıstı baslaw imkaniyatları, ámeliy járdem hám jeńillikler, sonday-aq, motivaciyalıq másláhátler berildi.
Psixologiya tarawındaǵı usınıslar arqalı qatnasıwshılarda qızıǵıwshılıq hám jumısqa kirisiw ruwxı arttırıldı. Ilaj sońında hayal-qızlar ózlerin qızıqtırǵan sorawlarǵa tolıq juwap aldı hám keleshekte isbilermenlik tańlawlarında belsene qatnasıwǵa tayar ekenligin bildirdi.