Taxtakópir rayonlıq elektr támiynatı kárxanasınıń jańa imaratı paydalanıwǵa tapsırıldı
2025-12-23 20:10:00 / Жаңалықлар
Taxtakópir rayonlıq elektr támiynatı kárxanasınıń jańa imaratı paydalanıwǵa tapsırıldı
Búgin Taxtakópir rayonında rayonlıq elektr támiynatı kárxanasınıń jańa imaratı paydalanıwǵa tapsırılıwı múnásibeti menen saltanatlı ashılıw máresimi bolıp ótti.
Ilajda rayon hákimi J.Adilov, taraw juwapkerleri hám keń jámiyetshilik wákilleri qatnastı. Onda shıǵıp sóylegenler 22-dekabr - "Energetikler kúni" hám Jańa jıl bayramı aldınan zamanagóy jańa imarat hám xızmet avtomashinası paydalanıwǵa tapsırılǵanı menen jıynalǵanlardı qızǵın qutlıqlap, bul imarattıń aymaq elektr támiynatı sistemasın bunnan bılay da jetilistiriwdegi áhmiyetin ayrıqsha atap ótti.
Atap ótiw kerek, Ózbekstan Respublikası Prezidentiniń 2020-jıl 11-noyabrdegi PQ-4889-sanlı qararı tiykarında bul obekttiń qurılısı ushın 5 mlrd. 171 mln sum qarjı ajıratılǵan bolıp, qurılıs procesinde energiya únemlewshi hám zamanagóy texnologiyalardan keńnen paydalanıldı hám imarat barlıq zamanagóy talaplarǵa say halda qurıldı.
Jańa imarat elektr támiynatı kárxanası xızmetkerleri ushın qolaylı miynet sharayatların jaratıw, xalıqqa kórsetilip atırǵan xızmetlerdiń sapasın arttırıw hám elektr támiynatı sistemasınıń turaqlı jumısın támiyinlewge tiykar boladı.