Taxtakópir rayonında jumıs alıp barıwshı «Kausar Tegirmon» juwapkershiligi sheklengen jámiyetiniń saltanatlı ashılıw máresimi bolıp ótti
2025-12-23 20:05:00 / Жаңалықлар
Búgin Taxtakópir rayonında jumıs alıp barıwshı «Kausar Tegirmon» juwapkershiligi sheklengen jámiyetiniń saltanatlı ashılıw máresimi bolıp ótti.
Ilajda rayon hákimi J.Adilov qatnasıp, isbilermendi usı iri joybar hám kárxananıń iskerligi menen qızǵın qutlıqladı hám onıń aymaq ekonomikasın rawajlandırıw, isbilermenlikti qollap-quwatlaw, jańa jumıs orınların jaratıw hám de xalıqtı sapalı azıq-awqat ónimleri menen támiyinlewdegi áhmiyetin ayrıqsha atap ótti.
Bunnan soń rayon hákimi hám ilajda qatnasqan keń jámiyetshilik wákilleri dándi qayta islew quwatlılıǵına iye zamanagóy un zavodınıń jumısı menen jaqınnan tanıstı.
Maǵlıwmat ornında aytıw kerek, Ózbekstan Respublikası Prezidentiniń Qaraqalpaqstan Respublikasın sociallıq-ekonomikalıq jaqtan jáne de rawajlandırıw, isbilermenlik subektlerin qollap-quwatlawǵa qaratılǵan párman hám qararlarınıń orınlanıwı sheńberinde jámiyet tárepinen 2024-jılı "Agrobank"tiń jeńilletilgen krediti esabınan ulıwma bahası 32 mlrd. sumlıq sharwashılıqtı rawajlandırıw hám sútti qayta islew joybarı ámelge asırıldı.
Sonday-aq, sırt elden 120 bas násilli qaramal alıp kelinip, sharwashılıq potencialı jáne de bekkemlendi. Joybar sheńberinde ulıwma bahası 500 mln. sumlıq sútti qayta islew kárxanası iske qosılıp, 7 puqara turaqlı jumıs penen támiyinlendi.
Búgingi kúnde sharwashılıq kompleksinde Germaniya, Daniya hám Ukraina mámleketlerinen alıp kelingen 170 bastan aslam násilli qaramallar baǵılmaqta. Jámiyet qaramaǵındaǵı 500 gektar egislik maydanlarında sharwa malları ushın toyımlı ot-shóp jetistirilmekte.
Sútti qayta islew kárxanasında házirgi waqıtta qadaqlanǵan qatıq, smetana, yogurt, toraq hám tvorog sıyaqlı ónimler islep shıǵarılıp, ishki bazarǵa jetkerip berilmekte.
Ózbekstan Respublikası Prezidentiniń 2023-jıl 8-avgust kúngi «Qaraqalpaqstan Respublikasında isbilermenlerge qolaylı sharayatlar jaratıwǵa tiyisli qosımsha is-ilajları haqqında»ǵı PP-129-sanlı Pármanına tiykar, «Kausar Tegirmon» juwapkershiligi sheklengen jámiyetine rayondaǵı «Dáwqara» APJ aymaǵınan 100 gektar jer maydanı ajıratılıp, jámi bahası 10 mlrd. 300 mln. sumlıq intensiv miyweli baǵ jaratıldı.
Bunnan tısqarı, jámiyet tárepinen ulıwma bahası 878 mıń AQSh dolları bolǵan júndi qayta islew, sonday-aq, 46 milliard sumlıq dándi qayta islew joybarları da basqıshpa-basqısh ámelge asırılmaqta. Bunda Túrkiya texnologiyası tiykarında sutkasına 45 tonna dándi qayta islew quwatlılıǵına iye zamanagóy un zavodı qurılıp, nátiyjede Qaraqalpaqstan Respublikasında jáne bir jańa un islep shıǵarıw kárxanası jumıs basladı.
Eń áhmiyetlisi, bul joybar rayonımızdı sociallıq-ekonomikalıq jaqtan jáne de rawajlandırıw, xalıqtıń bántligin támiyinlew, jergilikli óndiris potencialın arttırıw hám bazardı sapalı hám básekige shıdamlı azıq-awqat ónimleri menen támiyinlewde úlken áhmiyetke iye bolıp, joybarlar sheńberinde 100 den aslam jańa jumıs orınları jaratıldı.