Sudlar jumısında jasalma intellekt texnologiyaları engiziledi
2025-10-10 11:30:00 / Министрлик
Sudlar jumısında jasalma intellekt texnologiyaları engiziledi
Sudlardıń jumısında jasalma intellekt (JA) texnologiyaların engiziw - bul sud-huqıq sistemasın nátiyjeli hám ashıq-aydın etiwge qaratılǵan áhmietli baǵdar bolıp esaplanadı. Dúnyada ayırım mámleketler bul baǵdarda sezilerli qádemler taslaǵan. Mámleketimizde de sudlar jumısında jasalma intellekt (AI) texnologiyaların engiziw maqsetinde Ózbekstan Respublikası Prezidentiniń 2025-jıl 21-avgusttaǵı "Sudlar jumısında jasalma intellekt (AI) texnologiyaların engiziw arqalı ádil sudlawǵa erisiw dárejesin arttırıw hám sud sistemasınıń materiallıq-texnikalıq támiynatın jaqsılawǵa baylanıslı qosımsha ilajlar" atamasındaǵı pármanı qabıl etildi. Usı pármanǵa bola, puqaralar hám isbilermenlik subektlerine qolaylıqlar jaratıw hám sud islerin kóriwdi ápiwayılastırıw maqsetinde "Sanlı sud" koncepciyasın ámelge asırıw sheńberinde, sudlarǵa arza beriwden aldın jasalma intellekt járdeminde sud dodalawınıń shama menen nátiyjesi hám jumsalǵan qárejetler qáliplestiriliwi, sonday-aq, jasalma intellekt járdeminde sud májilisleriniń protokolları real waqıt rejiminde tekst túrinde tayarlanıwı belgilengen.
Sudlardıń jumısında jasalma intellekt (JA) texnologiyaların engiziw sud procesin tezlestiriw hám ádil qarar qabıl etiwge, insan tásirin azaytıwǵa, ashıq-aydınlıq hám jámiethiliktiń isenimin arttırıwǵa, artıqsha qaǵazbazlıq hám byurokratiyanı qısqartıwǵa járdem beredi.
Nókis rayonlar aralıq hákimshilik sudınıń sudyası: S.Karamatdinova