Qaraqalpaqstan Respublikası Taqıyatas rayonı hákimligi

Ózbekstan Respublikasi Prezidentiniń 2025-jıl 21-avgust kúngi
140-sanlı Pármanınıń mazmunı hám mánisi haqqında

Ózbekstan Respublikasi Prezidentiniń 2025-jıl 21-avgust kúngi «Sudlar iskerligine jasalma intellekt texnologiyaların engiziw arqalı ádil sudlaw erisiw dárejesin asırıw hámde sud sistemasınıń materiallıq texnikalıq támiynatın jaqsılawǵa baylanıslı qosımsha is-ilájları haqqında»ǵı 140-sanlı Pármanı qabıl etildi.

Sudlar iskerligine jasalma intellekt texnologiyaların engiziw ushın qolaylı shárayatlar jaratıw, sanlastırıw islerin izbe-izlikte dawam ettiriw, sudlardıń materiallıq-texnikalıq támiynatın jaqsılaw, sonday-aq, «Sanlı Ózbekstan-2030» strategiyasında belgilengen maqset hám wazıypalar orınlanıwın támiynlew ushın tómendegi maqsetler ilgeri súrildi.

Sudlar iskerligine jasalma intellekt texnologiyaların engiziw hámde sanlastırıw processlerin jedellestiriw, sonday-aq, sudlarda puqaralar hám isbilermenlik subektleri ushın qolay shárayatlar jaratıp beriwdiń kelesi jıllardaǵı ústin maqsetleri etip tómendegiler belgilendi;

a) sud islerin júritiwde qaǵaz túrinen waz keshiw maqsetinde «Sanlı sud» koncepciyası tiykarında islerdiń júritiliwin basqıshpa-basqısh tolıq elektron túrine ótkeriw;

b) puqaralar hám isbilermenlik subektlerine kórsetiletuǵın interaktiv elektron xızmetler túrlerin asırıp barıw, sud hújjerlerinen kóshirme alıw, sud isleri menen tanısıw, arzanıń sudqa tiyisliligi hám sudlawǵa tiyisliligin anıqlaw, jasalma intellekt járdeminde sud qárejetlerin esaplaw imkániyatın jaratıw, sonday-aq, sud tárepinen qadaǵan etilgen derek hám kontentlerdiń elektron reestrin júritiw;

v) sudlar iskerligine jasalma intellekt texnologiyaların engiziw ushın zárúr texnik infrasistema jaratıw, sonday-aq, bul jónelistegi normativ-huqıqıy bazanı jedellestiriw boyınsha sharalar kóriw;

g) Joqarǵı sudtıń xabar sistemaları negizinde sud hújjetleri arxivi modulin islep shıǵıw hám tájiriybege engiziw;

d) sud iskerliginde sanlastırıw boyınsha «Kiber huqıq» jónelisinde ilimiy izertlewler ótkeriw, sonday-aq, sudyalar hám sud apparatı xızmetkerleriniń sanlı bilimi hám mamanlıǵın turaqlı asırıp barıw;

j) ekonomikalıq sudlar sistemasın optimallastırıw arqalı olardıń iskerlik nátiyjeliligin asırıw hám birden-bir sud tájiriybesin sáwlelendiriw;

z) «Sanlı sud» koncepciyası tiykarında basqıshpa-basqısh sud májilisi zalların shólkemlestiriw hámde xalıq hám sudyalar ushın qolaylı hám zamanagóy shárayatlar jaratıw, sonday-aq, sudyalar hám sud xızmetkerleriniń sociallıq qorǵalıwın kúsheytiw etip belgilendi.

Bunnan tısqarı, sudlar iskerligine «Sanlı sud» koncepciyasın engiziw boyınsha Joqarǵı sud, Sanlı texnologiyalar ministrligi, Ekonomikalıq hám finans ministrliginiń sudlar iskerliginde jasalma intellekt texnologiyaların engiziw hám sanlastırıw processlerin jedellestiriwge qaratılǵan «Sanlı sud» koncepciyasın basqıshpa-basqısh ámelge asırıw haqqındaǵı usınısına razılıq berilgen. Puqaralar hám isbilermenlik subektlerine qolaylıqlar jaratıw hámde sud islerin kóriwdi ápiwayılastırıw maqsetinde «Sanlı sud» koncepciyasın ámelge asırıw sheńberinde, sudqa arza beriwden aldın jasalma intellekt járdeminde sud dodalawınıń shamalap nátiyjesi hámde sarplanatuǵın qárejetler sáwlelendiriledi, múrájatlar sudqa elektron túrde jiberiledi, iste qatnasıwshı shaxslar sud imáratına kelmeydi hám sud dodadawlarında aralıqtan turıp qatnasadı, tárepler hám iste qatnasıwshı basqa shaxslarǵa sud dodalawlarında iste baylanıslı barlıq materiallar menen elektron túrde tanısıw imkániyatı jaratıladı, sud qárejetleri elektron túrde esaplanadı hám tólenedi, sonday-aq, orınlaw xatlar avtomatik tárizde orınlawǵa jiberiledi, sud isleri zamanagóy xabar texnologiyalarınan paydalanǵan halda tolıq elektron tárizde júritiledi, jasalma intellekt járdeminde sud májilisi bayannamaların real waqıt rejiminde tekst túrinde tayarlanadı, sud hújjeleri proektleri avtomatik sáwlelendiriledi.

Nókis rayonlar aralıq hákimshilik sudınıń baslıǵı                               R.Jumabaev